केपी ओलीको सबै ठगी धन्दा रहेछ : प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले एमाले अध्यक्ष केपी शर्मा  ओलीले पार्टी एकताको नाममा ठगी धन्दा चलाएको आरोप लगाएका छन् । 

 आज शनिबार वाईसीएल नेपालको राष्ट्रिय कार्यकर्ता भेलालाई सम्बोधन गर्दै प्रचण्डले भ्रष्टाचार गर्दिनँ भन्ने ओलीले ठिक विपरित कार्य गरेको आरोप लगाए । ओलीले एउटा भन्ने र अर्कै गर्ने प्रचण्डको भनाइ छ । कार्यक्रममा उनले भने, ‘भ्रष्टाचार गर्ने मान्छेलाई देख्न पनि चाहन्नँ भन्ने त केपी ओलीको भाषामात्रै रहेछ । रक्सी अर्कै छ, लेबल त्यो राख्ने भन्ने रहेछ उहाँको बानी त ।’

अध्यक्ष पालो–पालो, प्रधानमन्त्री पालो–पालो भन्नेमा पनि सही गरेका थिए । तर, त्यो त ओलीले प्रधानमन्त्री पाउनका लागि ठगी धन्दा चलाएका रहेछन् । तमसुकमा सही गरेपछि त होला नि भन्ने लागेको थियो । तमसुक हेरेर बसिएको थियो उनले प्रधानमन्त्री पड्काए । त्यो गठी धन्दा रहेछ ।’
 केपी ओली प्रवृत्तिका कारण कम्युनिष्ट आन्दोलनमा ठूलो धक्का लागेको भन्दै अध्यक्ष प्रचण्डले त्यसका विरुद्ध संघर्ष जारी नै रहेको धारणा राखेका छन् ।