हत्याकाे अभियोगमा पक्राउ परेका कांग्रेस नेता मोहम्मद आलमको मुद्दामाथि आज पनि सुनुवाई भएन

काठमाडाैं । रौतहट बम विष्फोट तथा ज्यान मार्ने उद्योगमा पक्राउ परेका कांग्रेस नेता एवं पूर्वमन्त्री मोहम्मद आफताब आलमकाे मुद्दाम आज (शुक्रबार) पनि सुनुवाइ नहुने भएको छ ।

नेता मोहम्मदको मुद्दा सर्वोच्च अदालतका न्यायाधीशद्वय प्रकाश मानसिंह राउत र प्रकाश कुमार ढुंगानाको संयुक्त इजलासमा एक नम्बरमै पेशी तोकिएर पनि विपक्षीका कानुन व्यवसायीहरुको माग बमोजिम सर्वोच्चले सुनुवाइ स्थगित गरिदिएको हो ।

केही स्थानीयलाई जिउँदै इँटाभट्टामा हालेर हत्या गरेको घटनामा जिल्ला अदालत रौतहटले आलमलाई थुनामा राख्न आदेश दिएको थियो । त्यसविरुद्ध आलम उच्च अदालत वीरगञ्ज पुगेका थिए । उच्च अदालतले पनि जिल्लाकै आदेश सदर गरेको थियो ।

जिल्ला र उच्च अदालतले थुनामै राखेर मुद्दाको किनारा लगाउन आदेश दिएपछि उनी सर्वोच्चमा पुगेका थिए । जहाँ उनले थुनामुक्त गरेर मुद्दाको अन्तिम सुनुवाइ गर्न माग गरेका छन् । आलम अहिले ललितपुरको नख्खु कारागारमा छन् ।