अस्पतालको शय्याबाट झलनाथको सम्बोधन: दोस्रो पुस्ता मध्यपन्थ र अवसरवादमा मिसियो

काठमाडौँ । भारतमा उपचाररत नेता झलनाथ खनालले नेकपा (एकीकृत समाजवादी)को बैठकलाई सम्बोधन गर्दै एमालेकाे दोस्रो पुस्ताका नेताहरुप्रति कटाक्ष गरेका छन् ।

भारतको नयाँ दिल्लीमा उपचाररत नेता खनालले अडियोमार्फत पार्टीको केन्द्रीय कमिटी बैठकलाई सम्बोधन गर्दै दोस्रो पुस्ताका नेताहरु मध्यपन्थ अवसरवादमा मिसिएको दाबी गरेका छन् ।

‘दोस्रो पुस्ताका साथीहरु कुन ठाउँमा पुग्नुभएको छ ? हाम्रा पार्टीका धेरै साथीहरुलाई मध्यपन्थ र अवसरवादमा मिसिए । मध्यपन्थको आयु छाटो हुन्छ । त्यसले चाँडो नै परिणाम देखाउँछ । अब प्रदेशहरुमा पनि मध्यपन्थको रुप देखिनेछ । त्ययसका विरुद्ध हामीले संघर्ष गर्नुपर्नेछ,’ खनालले भने ।

एकीकृत समाजवादीको केन्द्रीय कमिटी बैठकमा खनालले आफूले विद्रोहमार्फत नयाँ पार्टी निर्माणमा जुटेको बताएका छन् ।

‘विद्रोहको प्रक्रिया अघि बढेको छ । हामी नयाँ पार्टी निर्माण गर्ने अभियानमा जुटेका छौँ,’ खनालले भने, ‘एमाले नेतृत्वमा निर्वाचित भएसँगै पहिलो दिनदेखि नै कार्यदिशा, सिद्धान्त, विधि विधानलाई लत्याउँदै हिड्यो । त्यसले अहंकारवादको बाटो लियो, व्यक्तिवादको रुपमा लियो, दक्षिणपन्थी बाटो लियो । बाढी पसे पार्टीमा झै बुर्जुवा विचार प्रवेश गर्न थाले । व्यक्तिगत फाइदा र गुटगट फाइदा मात्रै भयो । जनवर्गीय संगठन निर्माण भएन ।’

 ४१ महिना ओलीले सरकार चलाउँदा नेतृत्वले पार्टीलाई भताभुंग बनाएको आरोप लगामउँदै उनले भने, ‘अवसरवादी नेतृत्वको कारण पार्टी भाताभुंग भएको छ । ४१ महिना पनि शासन गर्दा, पार्टीलाई लत्याएर मनपरी तन्त्र चलाए । सरकारका नीति कार्यक्रम, बजेट पार्टीले थाहा पाएन । चुनावी घोषणापत्रले पूर्व जानुपर्छ भन्यो, ओलीले पश्चिमतिर लागे ।’