एमाले स्थायी कमिटी बैठक बस्दै, होला त १० बुँदे सहमतिको कार्यान्वयन ?

काठमाडौं। नेपाल कम्युनिष्ट पार्टी (नेकपा) एमालेको स्थायी कमिटी बैठक आज बस्दै छ। 

बैठक बिहान ११ बजे ललितपुरको च्यासलस्थित तुलसीलाल स्मृति प्रतिष्ठानको भवनमा बस्ने एमाले प्रवक्ता प्रदीप ज्ञवालीले जानकारी दिए। 

यसअघि सोमबार एमाले अध्यक्ष केपी शर्मा ओलीको निवास बालुवाटारमा छलफलका लागि पुगेका दोश्रो धारका नेताहरुसँगको कुराकानी र उनीहरुको आग्रहपछि बैठकको मिति तय गरिएको थियो। हिजोको बैठकमा एमाले विवाद समाधान गर्न गठिन कार्यदलले तय गरेको १० बुँदे सहमति कार्यान्वयन गर्ने समझदारी भएको थियो ।

यता, आजको बैठकमा एकता पक्षधर नेताहरुले १० बुँदे सहमति अक्षरशः कार्यान्वयन गर्न गरेको माग लगायतका विषयमा छलफल हुने बताइएको छ। यस्तै, बैठकले १० बुँदे सहमतिअनुसार एमालेलाई २०७५ जेठ २ गते अगाडिको अवस्थामा फर्काउने कार्यतालिका बनाउने नेताहरुको भनाइ छ ।

बैठकमा ‘मध्यमार्गी’ पक्षमा रहेका नेताहरु पनि उपस्थित हुने जनाइएको छ ।