एमाले सांसदहरुको दबाब छल्न सभामुख नै गायब

काठमाडाैं । पार्टीले कारबाही गरेका  १४ जना सांसदहरुलाई चाँडो पदमुक्त गर्न दबाब दिंदै सभामुख अग्नि प्रसाद सापकोटाको कार्यकक्ष  घेराउ गर्न पुगेका नेकपा एमालेका सांसदहरु धर्ना स्थगित गरेर बाहिरिएका छन् ।

एमालेका सांसदहरु कार्यकक्षमा कुरेर बसेको थाहा पाएपछि सभामुख अग्निप्रसाद सापकोटा कार्यालय नै उपस्थित नभएपछि उनीहरू बाहिरिएका हुन् ।

लामो समय कुरेर बस्दा पनि सभामुख  नआएपछि एमाले सचेतक शान्ता चौधरीले सभामुख सापकोटालाई फोन गरिन् । तर, सभामुख सापकोटाले आज आफू कार्यालय नआउने जानकारी गराएपछि एमाले नेताहरु सचिवालयबाट फर्किएका छन् । 

सिंहदरबारस्थित सभामुखको कार्यालयमा धर्ना दिनका लागि एमाले सांसद गोकुल बाँस्कोटा, शान्ता चौधरी, धनमाया थापा, लालबाबु पण्डितलगायतका एक दर्जन सांसद पुगेका थिए । 

यसअघि बिहीबार पनि पार्टीले कारबाही गरेका १४ सांसदलाई पदमुक्त गर्न दवाव दिँदै एमाले सांसदहरु सभामुखको कार्यकक्षमा पुगेका थिए । तर सो क्रममा एमाले सांसदहरुले सभामुखले निष्पक्ष भूमिका निर्वाह नगरेको आरोप लगाएपछि चर्काचर्की नै भएको थियो ।