सभामुख सापकोटालाई ओलीको धम्की 

काठमाडौं । नेकपा (एमाले)का अध्यक्ष केपी शर्मा ओलीले सभामुख अग्निप्रसाद सापकोटालाई धम्की दिएका छन् । उनले सापकोटाले निष्पक्ष भूमिका निर्वाह गर्न नसकेको आरोप लगाएका छन् ।  अध्यक्ष ओलीले मंगलबार एमालेका १४ सांसदलाई पार्टीबाट निस्कासन गर्न संसद सचिवालयमा पत्र दर्ता गराएका थिए ।

दल दर्ताका लागि अध्यादेश जारी गर्ने दिन ओलीले सांसदलाई कारबाहीको पत्र दर्ता गराएका थिए । सभामुख सापकोटाले शीर्षनेतासहितलाई कारबाहीको माग गरिएको पत्रको प्रक्रिया अगाडि नबढाएपछि ओलीले आज एक सार्वजनिक कार्यक्रममा सभामुख सापकोटालाई धम्कीको भाषा प्रयोग गरेका छन् । 

एमाले अध्यक्ष ओलीले सभामुख सापकोटालाई आफैं माओवादी कार्यकर्ताजस्तो बनेर र न्यायाधीशजस्तो बनेर निष्पक्ष भूमिका निर्वाह गर्न नसकेको आरोप लगाएका छन् । ओलीले धम्कीको भाषामा भनेका छन्–‘अग्नि सापकोटाजीलाई म सोध्न चाहान्छु– संसद चलाउनु छ कि छैन ? गैरकानुनी ढंगले, मनमौजी ढंगले संसद चल्न सक्दैन । उहाँलाई सभामुख हुनु छ कि छैन ? एउटा पार्टी कार्यकर्ताको भूमिकामा रहेर सभामुख हुन सकिँदैन ।’

ओलीले नेकपा एमाले(समाजवादी) दर्ता गराएका माधव नेपालसहितका १४ सांसदलाई कारबाही नगरेको बिषयलाई लिएर संसद नै चल्न नदिने धम्की दिएका हुन् ।