पार्टी दर्ताका लागि नाम र चुनाव चिन्हमा छलफल गर्दै नेपाल समुह

काठमाडाैं । वरिष्ठ नेता माधव नेपालसहित उनी पक्षीय नेताहरु नयाँ पार्टी गठनबारे अन्तिम छलफल गर्न बानेश्वरस्थित एक होटलमा जुटेका छन् ।

उक्त छलफलमा नेता नेपालसहित एमाले अध्यक्ष केपी ओलीको कारवाहीमा परेका सवै सांसद र अन्य नेताहरु समेत सहभागी छन् ।

नयाँ बानेश्वरस्थित होटल अर्यालमा जारी बैठकमा हस्ताक्षर संकलनसहित नाम र चुनाव चिन्हबारे छलफल भइरहेको केन्द्रीय सदस्य राजेन्द्र राईले जानकारी दिए ।

‘अन्तिम टुंगो लागिसकेको छैन, एमाले समाजवादी राख्ने कि भन्ने कुरामा कुरा मिल्ला जस्तो छ, छलफल जारी छ’, राईले भने ।

राईका अनुसार नेपालको अध्यक्षतामा निर्वाचन आयोगमा दर्ता हुने पार्टीको चुनाव चिह्न खुल्ला किताबमाथि सूर्य या अरु पनि विकल्पका बारेमा छलफल भइरहेको छ ।