प्रचण्ड भन्छन्- कम्युनिस्ट पार्टीभित्र चरम निरंकुशतावादी र फाँसीवादी प्रवृत्ति देखियो

काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले कम्युनिष्ट पार्टीभित्रै निरंकुशतावादी र फाँसीवादी प्रवृत्ति देखिएको बताएका छन् । 

शहीद रामवृक्ष यादवको २७औँ स्मृति दिवसका अवसरमा आज माओवादी केन्द्रको पेरिसडाँडास्थित पार्टी कार्यालयमा आयोजित कार्यक्रमलाई सम्बोधन गर्दै उनले कम्युनिस्ट भित्र चरम निरंकुशतावादी, फाँसीवादी र आत्मसमर्पणवादी प्रवृत्ति हावी भएको बताएका हुन् ।

कम्युनिष्ट पार्टीभित्रै विभिन्न नकारात्मक प्रवृत्ति रहेको उल्लेख गर्दै उनले भने-  “सम्पूर्ण उपलब्धिलाई धराशयी पार्ने प्रवृत्ति कम्युनिष्ट पार्टीभित्रबाट देखापर्याे, त्यसलाई हामीले प्रतिगमन भन्यौँ, त्यो प्रतिगमन अहिलेलाई पराजित भएको छ, हामीले त्यसकाविरुद्ध निर्मम ढङ्गले सङ्घर्ष र विद्रोह गर्नुपर्ने स्थिति देख्यौँ र विद्रोह गर्याै ।”

“हामी सबै पद, प्रतिष्ठामा ध्यान दिने व्यक्तिवादी भएका छौँ, यसमा समीक्षा गनुपर्ने भएको छ, विचार, सिद्धान्त र वर्गप्रति समर्पित हुनु अहिलेको आवश्यकता हो ।”  

मुलुकमा संघीय लोकतान्त्रिक गणतन्त्र स्थापना भएपछि संविधान जारी भएपनि समाजवादको यात्रा अझै जारी रहेको उनले बताए ।