संसद अधिवेशनको अन्त्यपछि तरंगित बनेका ओलीले बोलाए एकै दिन दुई बैठक, नेपाल पक्ष उपस्थित नहुने

काठमाडौं । नेपाल कम्युनिष्ट पार्टी (नेकपा) अध्यक्ष केपी शर्मा ओलीले स्थायी कमिटी र संसदीय दलको बैठक बोलाएका छन्। 

सोमबार अबेरसम्म ओली  निवास बालकोटमा बसेको स्थायी समिति बैठकले भावी रणनीति तय गर्न  आज ११ बजे स्थायी कमिटी र अपरान्ह तीन बजे संसदीय दलको बैठक बोलाएको हो ।

शेरबहादुर देउवा नेतृत्वको सरकारले सोमबार संसद अधिवेशन अन्त्य गरी राजनीतिक दल विभाजन सम्बन्धी अध्यादेश ल्याउने तयारी गरेको सूचना पाएपछि  बालकोटमा एमाले स्थायी कमिटी अन्तर्गत ओली पक्ष नेताहरुको बैठक बसेको थियो ।

आजको स्थायी कमिटी बैठक च्यासलस्थित तुलसीलाल स्मृति प्रतिष्ठानमा बस्नेछ भने संसदीय दलको बैठक संसद भवन बानेश्वरमा बस्ने बताइएको छ । 

सोमबारको बालकोट बैठकमा सरकारका कामकारबाही र एमाले विभाजन गर्नकै लागि सरकारले अध्यादेश ल्याउने तयारी गरेकाले त्यसका बिरुद्ध कसरी अगाडि बढ्ने भन्ने सम्बन्धमा छलफल भएको एमाले संसदीय दलका प्रमुख सचेतक विशाल भट्टराईले बताए। 

उनका अनुसार मंगलबारको बैठकमा माधवकुमार नेपालपक्षलाई पनि बोलाइएको छ।

यद्यपि नेपाल पक्षका नेता युवराज ज्ञवालीले ओलीले बोलाएको दुवै बैठकमा सहभागी नहुने बताउदै  उनले भने, ‘स्थायी कमिटी बैठकमा अनिवार्य उपस्थित हुन भन्दै म्यासेज भने आएको छ। तर, हामी बैठकमा उपस्थित हुदैनौं,’ ज्ञवालीले भने, ‘पार्टीमा कुनै सहमति नगरी बैठकमा उपस्थित हुने भन्ने कुरा हुँदैन, बैठकमा जादैनौं।’