ओलीसँग नमिल्न नेपाललाई बाबुरामको सुझाव ! ‘प्रतिगमनको नयाँ भेरियन्ट आउन सक्छ, पार्टीतिर नफर्कौं’

काठमाडौं । जनता समाजवादी पार्टी (जसपा)का संघीय परिषद् अध्यक्ष एवं पूर्वप्रधानमन्त्री डा. बाबुराम भट्टराईले कोरोना भाइरसझैं प्रतिगमनको पनि नयाँ भेरियन्ट आउन सक्ने टिप्पणी गरेका छन् । 

आइतबार राति पूर्वप्रधानमन्त्री भट्टराईले नेकपा एमालेको एकतातर्फ संकेत गर्दै सामाजिक सञ्जाल ट्वीटरमार्फत् यस्तो टिप्पणी गरेका हुन्। 

पछिल्लो समय एमालेको माधवकुमार नेपालपक्षले पार्टी अध्यक्ष केपी ओलीसँग सहमति गर्ने चर्चा चलिरहँदा अध्यक्ष भट्टराईको यस्तो भनाइ आएको हो। 

उनले पहिलो भेरियण्टले संविधानको सशरीर हत्या गर्न खोजेको उल्लेख गर्दै दोस्रो भेरियण्ट संविधानको आत्मा मार्नेगरी आउनसक्ने भन्दै एकता नगर्न सुझाब दिएको बुझ्न सकिन्छ। 

एमाले अध्यक्ष ओलीले दुई पटक प्रतिनिधि सभाविघटन गरेका थिए। उक्त कदमले संविधानको सशरीर हत्या गर्न खोजेको उल्लेख गर्दै अब चालिने कदमले संविधानको आत्म नै मार्ने बाबुरामको भनाई रहेको छ । यस्तो अवस्थामा आफ्नो पार्टी वा गुटतिर नफर्कनसमेत उनले अपिल गरेका छन्।

अध्यक्ष भट्टराईले ट्वीटमा भनेका छन्, ‘कोरोनाझैं प्रतिगमनको पनि नयाँ भेरियन्ट आउनसक्छ है! पहिलो असंवैधानिक भेरियन्ट पराजित भए पनि दोस्रो संवैधानिक वा अर्ली इलेक्सन भेरियन्ट आउनसक्छ! पहिलोले संविधानको सशरीर हत्या गर्दै थियो भने दोस्रोचाहिं संविधानको आत्मा मार्नेगरी आउनसक्छ। अत: ढुक्क भएर आ-आाफ्ना पार्टी वा गुटतिर नफर्कौं !’

कोरोना झैं प्रतिगमनको पनि नयॅा भेरिएन्ट आउनसक्छ है! पहिलो असंवैधानिक भेरिएन्ट पराजित भएपनि दोश्रो संवैधानिक वा अर्ली इलेक्सन भेरिएन्ट आउनसक्छ! पहिलोले संविधानको सशरीर हत्या गर्दैथियो भने दोश्रो चाहिं संविधानको आत्मा मार्नेगरी आउनसक्छ।अत:ढुक्क भएर आआाफ्ना पार्टी वा गुटतिर नफर्कौं!

— Baburam Bhattarai (@brb1954) August 8, 2021