माधव नेपाल समूहः नयाँ पार्टी पनि नखोल्ने, तत्काल सरकारमा पनि नजाने  

काठमाडौं । नेकपा एमालेका बरिष्ठ नेता माधवकुमार नेपाल पक्षको केन्द्रीय कमिटी बैठक जारी छ । बिहीबारदेखि सुरु भएको केन्द्रीय कमिटी बैठकमा ५५ जनाले धारणा राखिसकेका छन् । बैठकमा अधिकांश केन्द्रीय सदस्यहरुले पार्टी एकताकै पक्षमा जोड दिएका छन् ।

केही केन्द्रीय सदस्यहरुले केपी शर्मा ओलीसँग एकता गर्नै नहुने धारणा पनि राखेका छन् । नेपाली कांग्रेसका सभापति शेरबहादुर देउवाको नेतृत्वको सरकारमा सहभागी हुनुपर्ने धारणा पनि कतिपय केन्द्रीय सदस्यहरुले राखेका छन् । तर, बहुमत केन्द्रीय सदस्य एकताकै पक्षमा देखिएका छन् ।

 माधव नेपाल पक्षका एमालेका केन्द्रीय सदस्य सोमप्रसाद पाण्डेले पार्टी विभाजनको तयारी पनि नभएको र अहिलेको अवस्थामा नयाँ पार्टी खोल्ने अवस्था पनि नभएको बताएका छन् । ‘एमाले दुई पार्टी जस्तो अवस्था भएको र दूरी टाढा भएको भए पनि नयाँ पार्टी खोल्ने अवस्था छैन, तत्काल सरकारमा जाने संभावना पनि छैन’ पाण्डेले भने ।