माधवकुमार नेपालकाे दुवै हातमा लड्डु

काठमाडाैं । कांग्रेस सभापति शेरबहादुर देउवालाई प्रधानमन्त्री बनाउन सशक्त भूमिका खेलेका एमाले वरिष्ठ नेता माधवकुमार नेपालकाे हातमा अहिले अफरै अफरकाे चाङ छ ।

मुलुकको राजनीतिको निर्णायक व्यक्तिका रुपमा आफूलाई उभ्याउन सफल भएका नेता नेपाललाई विभिन्न पदको अफर भइरहेका छन् ।  

विशेषगरी देउवापछि उनलाई सरकार नेतृत्व गर्न दिने अफर गठबन्धनले गरेको छ । एमाले त्यागेमा चुनावी सरकारको नेतृत्व नेता नेपाललाई अफर आएको बताइएको छ । 

यस्तै, नेता नेपाललाई उच्चस्तरीय राजनीतिक संयन्त्रको अध्यक्ष बन्न प्रस्ताव गरिएको छ । 

यही बेला प्रधानमन्त्री देउवा, प्रचण्ड र जसपाका अध्यक्ष उपेन्द्र यादवले नेता नेपाललाई आफ्ना सांसद सरकारमा पठाउन र उच्चस्तरीय संयन्त्रको नेतृत्व गर्न प्रस्ताव गरेका हुन् । 

यता एमालेको एकताका लागि प्रयासरत् ओली र नेपाल दुवै समूहका नेताहरुले नेतृत्वमाथि दबाब सृजना गरिरहेका छन् । 

अध्यक्ष ओलीसरह अधिकार दिएर नेता नेपाललाई पनि अध्यक्ष बनाउनुपर्ने नेपाल समूहको माग छ । उक्त मागप्रति ओली समूह सकारात्मक रहेको नेताहरु बताउँछन् । 

माधवकुमार नेपाललाई प्रधानमन्त्री, राजनीतिक संयन्त्रको संयोजक र एमालेको दोस्रो अध्यक्ष अफर आएको हो। तर, उनले कुनलाई स्वीकारेर अघि बढ्छन्, त्यो भने हेर्न बाँकी नै छ ।