सर्वोच्चको फैसलापछि महेश बस्नेतको रोदन, लगाए अदालत थप विवादित बन्नेसम्मको आरोप !

काठमाडौं । नेपाल कम्युनिष्ट पार्टी (नेकपा) एमालेका युवा नेता एवं सांसद महेश बस्नेतले कर्णालीका सांसदहरुको विषयमा सर्वोच्च अदालतले गरेको फैसला स्वागतयोग्य भएको बताएका छन् । 

सोमबार दिउँसो सर्वोच्चले कर्णाली सांसदलाई पुन: पदमुक्तको फैसला गरेपछि एमाले नेता बस्नेतले सो फैसलालाई स्वागतयोग्य भएको बताएका हुन्। 

सामाजिक सञ्जालमार्फ़त फैसलाबारे उनले लेखेका छन्, ‘बहुदलीय व्यवस्था र संसदीय प्रणालीमा यो फैसला साह्रै स्वागतयोग्य छ। देउवा सरकारको गठनमा आएको परमादेशको विषयमा सांसदहरूलाई पार्टी ह्विप नलाग्ने उलंघन गरे बापत कार्बाही गर्न नपाइने फैसला बेठीक भएको अनुभुति गरेको जस्तो देखिन्छ’, 

 ‘त्यसो हुँदा अब अदालत सामु अर्को चुनौति थपिएको छ । मन्त्री हुन र अन्य लाभका निम्ति एमालेको सरकार ढालेर कांग्रेस सभापति देउवा प्रधानमन्त्री बनाउन लाग्ने २२ जना संघीय सांसदहरुलाई पार्टीले कारबाही गरेको अवस्थामा अदालतले के गर्ला? पद कायम राख्ला कि नराख्ला?’फेसबुकमार्फत नेता बस्नेतले अदालतलाई समेत प्रश्न गरेका छन्। 

उनले अगाडि भनेका छन्, ‘यदि कायम राख्यो भने यो फैसला पनि कर्णाली प्रदेशमा एमाले बाहेकको गठबन्धनलाई बहुमत पु¥याएर सरकार चलाउन सहयोग गरेको जस्तो देखिनेछ र घुमाएर एमालेलाई नै धक्का पुराइएको हुनेछ अदालत थप विवादित र अविश्वसनीय बन्दै जानेछ।’

एमाले सांसद बस्नेतको यस टिप्पणीबारे कतिपय एमालेकै कार्यकर्ताहरुले कमेन्टमै रोदनको संज्ञा दिएका छन्।