दार्चुला घटनामा गृहमन्त्रीले भने, ‘जस्तो प्रतिवेदन आउँछ सोही अनुसार सरकारले कदम चाल्छ’

काठमाडौँ । दार्चुलामा तुइनबाट खसेर एक नेपालीको मृत्यु भएको घटनामा गृहमन्त्री बालकृष्ण खाँणले सरकार गम्भीर रहेको बताएका छन् ।

उनले घटनाको छानबिनका लागि समिति गठन भैसकेकाे जानकारी दिँदै उक्त समितिको प्रतिवेदन पर्खन पनि आग्रह गरेका छन् ।

राष्ट्रियसभामा सांसदहरुले उठाएको प्रश्नको जवाफ दिँदै गृहमन्त्री खाँणले धैर्य गर्न पनि आग्रह गरे ।

उनले घटनाबारे छानबिन गर्न समिति सक्रिय भइसकेको र १० दिनभित्र प्रतिवेदन आउने पनि जानकारी दिए ।

उनले छानबिन प्रतिवेदन जस्तो आउँछ सोही अनुसार सरकारले कदम चाल्ने बताए ।

शुक्रबार भारतीय एसएसबीले तुइन काटिदिएपछि दार्चुलाका जयसिंह धामी महाकाली नदीमा बेपत्ता भएका थिए। उनको अहिलेसम्म पत्तो लागेको छैन ।

भारतीय ज्यादतीबारे बोल्न नसकेको आरोप लगाउँदै सांसदहरुले गृहमन्त्रीलाई प्रश्न सोधेका थिए ।