ओली–नेपाल टेलिफोन संवादः होला त भेटवार्ता ?

काठमाडौं । नेकपा एमालेका अध्यक्ष केपी शर्मा ओली र बरिष्ठ नेता माधवकुमार नेपालीबीच टेलिफोन संवाद भएको छ । शनिबार दिउँसो दुई नेताबीच टेलीफोन संवाद भएको हो । समिट होटलमा दोस्रो तहका नेताहरुबीच वार्ता भइरहेको समयमा घनश्याम भूसाल माधव नेपाल निवासमा पुगेर दुई नेताबीच टेलिफोन संवाद गराएका हुन् ।

यसअघि बिहीबार राति पनि यी दुई नेताबीच संवाद भएको सोमप्रसाद पाण्डेले बताएका थिए । टेलिफोन संवादमा शुक्रबार दुई नेताबीच वार्ता हुने भनिए पनि हुन सकेको थिएन । नेता नेपालले नै चासो नराखेपछि वार्ता हुन नसकेपछि एमालेको एकतामा पूर्णबिराम लागेको टिप्पणी भइरहेको बेला शनिबार पुनः टेलिफोन संवाद भएपछि वार्ता अगाडि बढ्ने संभावना बढेको छ । ओली र नेपाल आ आफ्नै अडानमा छन् । 

अध्यक्ष ओलीले १६ असारमा दशौं राष्ट्रिय महाधिवेशन आयोजक कमिटीको बैठक बसेर ८ स्थायी समिति सदस्य मनोनयन गरेका थिए । र,  १८ असारमा केन्द्रीय कमिटी बैठक राखेका थिए । जुन बैठकमा नेपाली कांग्रेसका सभापति शेरबहादुर देउवालाई प्रधानमन्त्री बनाउन माग गर्दै सर्वोच्च अदालतमा दायर रिटबाट हस्ताक्षर फिर्ता लिन सोमबारको समयसीमा तोकेको थियो । माधव नेपाल समूह भने असार १८ को बैठक अवैधानिक भनिरहेको छ ।