एमालेमा एकताका लागि अन्तिम कसरतः होटल समिटमा वार्ता जारी

काठमाडौं । नेकपा(एमाले)मा एकताका लागि अन्तिम कसरत भइरहेको छ । एकताका लागि दुवैपक्षका दोस्रो तहका नेता आज पनि वार्तामा छन् । होटल समिटमा प्रधानमन्त्री केपी शर्मा ओलीका तर्फबाट स्थायी कमिटी सदस्य बिष्णु पौडेलको नेतृत्वमा, शंकर पोखरेल र सुवासचन्द्र नेम्वाङ सहभागी छन् । वरिष्ठ नेता माधव नेपाल समूहबाट सुरेन्द्र पाण्डे, घनश्याम भुसाल, गोकर्ण विष्ट र भीम आचार्य छन् ।  

शुक्रबार प्रधानमन्त्री ओली र नेता माधव नेपालबीच वार्ता गराउने प्रयास असफल भएपछि एमालेमा एकताको प्रयास लगभग टुंगिएको अर्थ पनि कतिपयले लगाइसकेका थिए । तर आज पनि दोस्रो तहका नेताहरुको समिट वार्ता ओली–नेपाललाई संवाद गराएर मन माझामाझ गराउनेमा केन्द्रित छ ।

बिहीबार राति ओली नेपाल कुराकानी भएको र शुक्रबार भेटवार्ता हुने भनिएको थियो । तर नेता नेपालले नै चासो नराखेपछि वार्ता हुन सकेको थिएन । आज समिट वार्तामा दुवै पक्षका नेताहरुबीच एकताका लागि अन्तिम कसरत भइरहेको छ ।