देउवालाई प्रधानमन्त्री बनाउन हस्ताक्षर दिनु अनैतिक हाे, म ओलीको पक्षमा छुु– वामदेव

काठमाडौं । नेकपा एमालेका उपाध्यक्ष वामदेव गौतमले आफू अध्यक्ष केपी शर्मा ओलीको पक्षमा रहेको बताएका छन् । 

शुक्रबारबाट सुरु भएको पार्टीको केन्द्रीय कमिटी बैठकलाई सम्बोधन गर्दै उपाध्यक्ष गौतमले आफू ओली समूहमा रहेको स्पष्ट पारेका हुन् । 

आफूले हालसम्म मित्रघात नगरेको भन्दै बैठकमा गौतमले भने, ‘मैले आजसम्म मित्रघात गरेको छैन, जे भनिरहेको छु यो हाम्रो हितमा छ । व्यक्तिगत रूपमा म ओलीकै पक्षमा छु ।’ आफूलाई ओली समूहमा रहेको बताउने गौतमले मुख्य नेताहरुलाई अपमान गरेर पार्टी एकता हुन नसक्नेतर्फ सचेत गराए ।

माधवकुमार नेपालसहित असन्तुष्ट नेताहरुलाई समेटेरमात्रै एमाले एकताबद्ध हुन सक्ने बताएका उपाध्यक्ष गौतमले एकताको प्रयासलाई सार्थक निष्कर्षमा पुर्याउन ओलीलाई आग्रह गरेका छन् ।

मुख्य नेताहरुलाई सम्मानजनक व्यवहार नगरिएमा पार्टीको तलको पंक्ति भड्किन सक्नेतर्फ सचेत गराउँदै उनले माधव नेपालसहितको एकता हुनुपर्नेमा जोड दिए । 

नेपाली कांग्रेसका सभापति शेरबहादुर देउवालाई प्रधानमन्त्री बनाउन एमालेका नेताहरुले दिएको हस्ताक्षरलाई अनैतिकको संज्ञा दिएका गौतमले भने, ‘म भएको भए पार्टीबाट राजीनामा दिएर मात्रै देउवाका पक्षमा हस्ताक्षर गर्ने थिएँ ।’