वीरगञ्ज । रौतहटमा प्रहरी र स्थानीय बासिन्दाबिच आइतबार राति झडप हुँदा डिएसपीसहित सातजना प्रहरीहरु घाइते भएका छन् ।
गरुडा नगरपालिका वडा नम्बर ९ गेडही गुठी टोलमा भएको झडपमा परि प्रहरीहरु घाइते भएका हुन् । ईलाका प्रहरी कार्यालय गरुडाका प्रमुख एवम प्रहरी नायब उपरीक्षक द्वारिका घिमिरेसहित अन्य ६ जना प्रहरीहरु घाइते भएको रौतहटका प्रहरी उपरीक्षक शिद्धिबिक्रम शाहले जानकारी दिए ।
घाइते भएका डिएसपी घिमिरेको टाउकोमा चोट लागेको छ । जिल्लामा जारी गरिएको निषेधाज्ञाको समयमा गेडही गुठी टोलमा बिहेमा आएका जन्ती र स्थानीयबासी ठूलो संख्यामा जम्मा भएर नाचगान गरिरहेको बेलामा प्रहरी पुगेको थियो ।
प्रहरीले भिडभाड नगर्न आग्रह गर्दा स्थानीय र प्रहरी बिच झडप भएको हो । स्थानीयबासीले प्रहरीमाथि ढुंगा प्रहार गरेका थिए । प्रहरीलाई कुटपिट गरेको आरोपमा प्रहरीले स्थानीय २ जना नियन्त्रणमा लिएको छ ।
