मतपरिणाम नआउँदै एमालेले निकाल्यो बादल हार्ने निष्कर्ष, पार्टीको निर्देशन नमान्नेको भत्र्सना

काठमाडौं । बागमती प्रदेशका लागि रिक्त राष्ट्रियसभा सदस्यको लागि हेटौडामा आज उपनिर्वाचन सम्पन्न भइसकेको छ । मतगणना जारी छ । मतगणना हुनुअघि नै बिहीबार बसेको एमाले स्थायी समितिको बैठकले गृहमन्त्री रामबहादुर थापा पराजीत हुने निष्कर्ष निकालेको थियो ।

बादलको पराजय हुने सूईको पाएपछि स्थायी समिति बैठकले पार्टीका आधिकारिक उम्मेदवारबिरुद्ध मतदान गर्ने प्रवृत्तिको बिरोध गर्ने निर्णय गरेको थियो । आज बसेको स्थायी समिति बैठकले ३ वटा निर्णय गरेको थियो । जसमा तेस्रो निर्णय राष्ट्रियसभा निर्वाचनसम्बन्धी थियो । हेटौंडाबाट प्राप्त मत परिणाम अनुसार पनि एमालेका बादलभन्दा कलम चिह्न लिएका नेपाली कांग्रेस, माओवादी केन्द्र र एमालेकै माधव नेपाल समूहका साझा उम्मेदवार डा. खिमलाल देवकोटा अगाडि देखिएका छन् ।

स्थायी समिति बैठकले गरेको निर्णयको ३ नम्बर बुँदामा उल्लेख छ–‘आज बागमती प्रदेशमा सम्पन्न राष्ट्रियसभा सदस्यको उपनिर्वाचनमा देखापरेका पार्टीको निर्देशनबिपरीत पार्टीका आधिकारिक उम्मेदवारका बिरुद्ध मतदान गर्ने र पार्टी निर्णयको अवज्ञा गर्ने प्रवृत्तिलाई अत्यन्त गम्भीरताका साथ लिंदै भत्र्सना गरेको छ ।’