अरबौं नगद र राहत बिदुरमा थुपार्ने : बाढीप्रभावितलाई भोकभोकै राख्ने, दोषजति प्रदेश र स्थानीय सरकारलाई थोपर्ने ?

माधव पौडेल

काठमाडौं । बाढी आएको आज ७ दिन भइसक्दा पनि बिदुरबाट माथि जान नसकेको सरकारका प्रधानमन्त्री दिनैपिच्छे फेसबुकमा स्टाटस पोष्ट गर्ने र मोनिटाइज्ड पेजबाट डलर कमाउनेमा सीमित छन् । बिदुरमा राहत थुपारिएको छ । तर बेत्रावतीपारी पुग्न सकेको छैन सरकार ।

बेत्रावतीपारी पुग्न नसकेको सरकार त्रिशुली र त्योभन्दा धेरै माथि टिमुरे पुग्ने त कुरै भएन । बाढीबाट अति प्रभावित टिमुरे, बेत्रावती, त्रिशुलीजस्ता ठाउँमा केन्द्र बनाएर हेलिकोप्टरबाट राहत र उद्दार गर्नुपर्नेमा बिदुरको मैथिल ब्यारेकमा राहत थुपारिएका गुनासा आएका छन् । वास्तविक बाढी प्रभावित नागरिकको चित्कार सरकारले नसुनेका आवाजहरु आए भने प्रधानमन्त्री र उनको पार्टी रास्वपाले सामाजिक संजालबाट भद्दा र हेर्न र पढ्न नसकिने गालीगलौज गर्छन् ।

सरकार सामाजिक संजालमा राहत र उद्दार गरिरहेको, वास्तविक रुपमा बाढीपीडितको उद्दारमा ग्राउन्डमा पुग्न नसकिरहेको अवस्था छ । एकद्वार प्रणाली भनेर प्रदेश र स्थानीय तहका जनप्रतिनिधि र अरु दलका कार्यकर्तालाई राहत बितरण गर्नबाट रोकिएको छ । तर सरकारका पूर्वाधार बिकास मन्त्री सुनिल लम्साल भने विपत्ति आउनासाथ स्थानीय तहका जनप्रतिनिधि, प्रदेश र प्रमुख जिल्ला अधिकारी अटोमेटिक रुपमा परिचालित हुनुपथ्र्यो, त्यस्तो हुन सकेन भन्दै दोष थोपर्न थालेका छन् ।

एकद्वार प्रणाली भन्दै सबै प्रधानमन्त्री कार्यालय र संघीय सरकारले गर्छ भनेर रोक्ने, निस्कन पनि नदिने, अनि बाढी प्रभावितको उद्दार र राहतको कार्यक्रम पूरै असफल भएपछि दोषजति स्थानीय र प्रदेश सरकारतिर थोपर्ने काम रास्वपाको सरकार र त्यसका नेता कार्यकर्ताबाट हुन थालेको छ ।

बिपत्ति आउनासाथ भदौ १० गते नै स्थानीय र प्रदेश सरकारलाई राहत र उद्दारमा परिचालित हुन दिएको भए धेरै हदसम्म अहिलेको भन्दा बढी काम हुने थियो ।

बाढीप्रभावित स्थानीय तहका जनप्रतिनिधिमध्ये कतिपयका आफन्त नै बाढीमा हराइरहेका होलान् । केन्द्र सरकारले रोक्दारोक्दै पनि स्थानीय तहका जनप्रतिनिधिले भोकनिद्रा नै नभनी उद्दार र राहतका लागि खटिरहेका बेला रास्वपाकी विवादित सांसद आशिका तामाङले अभद्र र अमर्यादित शैलीमा मुख छोडेर उल्टै निरुत्साहित पार्ने काम गरेको दृश्यसमेत देखियो ।

बागमती सरकारका मुख्यमन्त्री बाढी प्रभावितको उद्दार र राहतका लागि प्रधानमन्त्री वालेन्द्र शाहसँग भेट गर्न जाँदा घन्टौं कुराएर सल्लाहकारसँग भेट्नू भन्दै पन्छिन्छन् । र, सल्ल्लाहकार कुमार बेनकोमा गएर ४ घन्टा आराम गर्दछन् । बेत्रावती पारीदेखि टिमुरेसम्म सब कुहिएर काग र गिद्धले खाएको समाचार सुन्नुपरेको छ ।

बाढी प्रभावित क्षेत्रमा हराइरहेका आफन्त सरकारले एक सातासम्म सास र लास दिन सकेन भन्दै रोइरहेका छन् । ती रोइरहेका नागरिकको आँसुले समेत वालेन सरकारलाई छुन सकेको छैन, उल्टै ती रुने नागरिकलाई रास्वपाका नेता कार्यकर्ता गालीगलौज गर्न उद्यत देखिएका छन् ।

मृतकका सब आफन्तले पाउनुपर्ने धारणा राख्दा रास्वपा कार्यकर्ता प्रभा ज्ञवालीले तिनैका घरमा पठाइदे सरकार एक एक वटा सब गाड्न भनेर लेख्ने अमानवीय हर्कत देखाइरहेका छन् ।