परराष्ट्रमन्त्रीद्वारा प्राकृतिक चिकित्सालय अवलोकन

भरतपुर ।  परराष्ट्रमन्त्री प्रदीपकुमार ज्ञवालीले आज भरतपुरको बागेश्वरीमा रहेको योगी नरहरिनाथ योग तथा प्राकृतिक चिकित्सालयको अवलोकन गर्नुभएको छ ।

उहाँले योग तथा प्राकृतिक उपचारमा निकै उल्लेखनीय कार्य गरेको भन्दै चिकित्सालयको भ्रमण गर्नुभएको हो । चितवनका जिल्लास्तरीय नेताहरूसहित बागेश्वरी पुग्नुभएका मन्त्री ज्ञवालीले चिकित्सालयको उपचार पद्धतिको जानकारी लिनुका साथै उपचाररत बिरामीसँग कुराकानी गर्नुभएको थियो ।

सोही अवसरमा चिकित्सालयको विकासका लागि निर्माण गरिएको गुरुयोजनाबारे मन्त्री ज्ञवालीलाई जानकारी गराइएको थियो । झण्डै रु ४८ करोड बढी बजेट लाग्ने अनुमान गरिएको गुरुयोजनाबारे जानकारी लिएपछि मन्त्री ज्ञवालीले सहयोग गर्ने प्रतिबद्धता व्यक्त गरेको चिकित्सालयका मेडिकल निर्देशक डा हेमराज कोइरालाले जानकारी दिनुभयो ।

सो क्रममा मन्त्री ज्ञवालीले यस क्षेत्रलाई योग तथा प्राकृतिक उपचारको हब बनाउनुपर्नेमा जोड दिनुभयो । नेपालमा कोरोना सङ्क्रमण बढ्दै गएको समयमा बागेश्वरीमा रहेको प्राकृतिक चिकित्सालय आइशोलेशनको रूपमा विकास गरिएको थियो ।

त्यहाँ गत भदौदेखि कोरोना सङ्क्रमितका लागि आइसोलेशन सेन्टरको रूपमा सेवा दिन थालिएको थियो । अहिले आइसोलेशन बन्द छ । रासस