भोटेकोसी–त्रिशूली बाढी : मृत्यु हुनेको संख्या १६२ पुग्यो

काठमाडौं । बुधबार बिहान रसुवाको भोटेकोशी नदीमा आएको भीषण बाढीका कारण मृत्यु हुनेको संख्या १६२ पुगेको छ ।

नेपाल प्रहरीले बिहीबार बिहान ५ बजेसम्म सार्वजनिक गरेको विवरणअनुसार बाढीमा परी विभिन्न जिल्लामा १६२ जनाको मृत्यु भएको हो ।

प्रहरीका अनुसार बाढीपछि चितवनमा सबैभन्दा धेरै ६४ जनाको शव फेला परेको छ। त्यस्तै, नवलपरासी पूर्वमा २६, धादिङमा २०, गोरखामा २०, नुवाकोटमा १२, तनहुँमा नौ, रसुवामा दुई र नवलपरासी पश्चिममा दुई जनाको शव फेला परेको छ ।

बाढीमा परी ४१ जना घाइते भएका छन्। घाइतेहरूको विभिन्न अस्पतालमा उपचार भइरहेको प्रहरीले जनाएको छ ।

भोटेकोशी नदीमा आएको बाढी त्रिशूली हुँदै नारायणी नदीसम्म फैलिँदा नदी आसपासका विभिन्न क्षेत्रमा ठूलो जनधनको क्षति भएको छ। बाढीका कारण अझै केही व्यक्ति बेपत्ता रहेको र प्रभावित क्षेत्रमा खोजी तथा उद्धार कार्य जारी रहेको प्रहरीले जनाएको छ ।

बाढीपछि नदीमा बगेका तथा बेपत्ता भएका व्यक्तिको खोजीका लागि नेपाल प्रहरीसहित सुरक्षा निकायका टोली परिचालन भएका छन्। सम्भावित क्षेत्रमा खोजी तीव्र पारिएको प्रहरीले जनाएको छ ।

बाढी प्रभावित क्षेत्रमा उद्धारसँगै बेपत्ताको खोजी, घाइतेको उपचार तथा विस्थापितको व्यवस्थापनलाई प्राथमिकता दिइएको छ ।