श्रीमानसंग विवाद हुँदा बौद्धमा एक महिलाले जिउमा पेट्रोल छर्केर लगाइन् आगो 

काठमाडौँ। काठमाडौँको बौद्धमा एक महिलाले आफ्नो जिउमा आफैँले पेट्रोल छर्केर आगो लगाएकी छन्।

जिल्ला प्रहरी परिसर काठमाडौँका प्रवक्ता एसपी पवनकुमार भट्टराईका अनुसार आज (मंगलबार) बिहान २:५० बजेतिर काठमाडौँ महानगरपालिका-६, बौद्ध गेटनजिक २७ कि सालु गुरुङले आत्मदाह प्रयास गरेकी हुन्।

काभ्रेपलाञ्चोक तेमाल गाउपालिका-३ घर भई हाल काठमाडौँको गोकर्णेश्‍वर नगरपालिका-८ माकलबारी बस्ने उनले श्रीमान्‌सँग विवाद हुँदा आफ्नै खाजाघर पछाडिको पार्किङमा आफ्नो शरीरमा पेट्रोल छर्की आगो लगाएको उनले बताए।

उनको श्रीमान्‌ले फेला पारी आगो निभाई उपचारका लागी सुष्मा कोइराला मेमोरियल अस्पताल साखु पुर्‍याएका थिए। त्यहाँ सामान्य उपचारपछि सालुलाई कीर्तिपुर बर्न अस्पताल रिफर गरिएको एसपी भट्टराईले जानकारी दिए।

उनको अनुहार, छाती र दुवै हातमा गरी अन्दाजी ५० प्रतिशत जलेको एसपी भट्टराईले बताए।