एमाले आफ्नै संगठनात्मक आधारमा अघि बढ्न सक्षम छ’: ओली

काठमाडौँ । नेकपा (एमाले) का अध्यक्ष केपी शर्मा ओलीले आफ्नो पार्टीलाई कमजोर बनाउने उद्देश्यले विभिन्न प्रयास भइरहे पनि एमाले आफ्नै संगठनात्मक आधारमा अघि बढ्न सक्षम रहेको बताएका छन्।

पार्टी केन्द्रीय कार्यालय च्यासलमा आयोजित वेबसाइट तथा मोबाइल एपको नयाँ संस्करण सार्वजनिक कार्यक्रममा बोल्दै अध्यक्ष ओलीले एमाले कुनै अर्को शक्तिको सहारामा मात्र टिक्ने संगठन नभएको दाबी गरे।

उनले पछिल्ला राजनीतिक परिस्थितिबाट पार्टीमा असर परेको भए पनि त्यसले एमालेको अस्तित्व समाप्त नभएको बताए। विभिन्न चुनौती, संकट र प्रतिकूल अवस्थाको सामना गर्दै पार्टी अघि बढेको उल्लेख गर्दै उनले आगामी दिनमा पनि आफ्नै शक्तिका आधारमा संगठनलाई पुनः सुदृढ बनाउने धारणा राखे।

अध्यक्ष ओलीले एमाले कठिन परिस्थितिबाट विचलित नहुने उल्लेख गर्दै पार्टीले विगतमा पनि अनेकौँ चुनौती पार गर्दै आएको बताए। उनले बाह्य सहाराबिना पनि पार्टीले आफ्नो राजनीतिक यात्रा निरन्तर अघि बढाउन सक्ने दाबी गरे।

कार्यक्रममा उनले प्रविधिको प्रयोगमार्फत पार्टी गतिविधिलाई थप व्यवस्थित र प्रभावकारी बनाउने उद्देश्यले वेबसाइट तथा एपको नयाँ संस्करण सार्वजनिक गरिएको जानकारी दिए।