पूर्वप्रधानमन्त्री बाबुराम भट्टराईले बुझाए सम्पत्ति विवरण 

काठमाडौँ। पूर्वप्रधानमन्त्री डा. बाबुराम भट्टराईले आफ्नो सम्पत्ति विवरण बुझाएका छन्। बुधबार भट्टराईले सम्पत्ति छानबिन आयोगसमक्ष आफ्नो सम्पत्ति विवरण बुझाएका हुन्।

काठमाडौँको केशरमहलस्थित सम्पत्ति छानबिन आयोगको कार्यालयमा सम्पत्ति विवरण बुझाइएको डा. भट्टराईको सचिवालयले जनाएको छ।

‘नेपाल सरकारद्वारा पूर्वउच्चपदस्थ पदाधिकारीहरूको सम्पत्ति छानबिन गर्ने निर्णयअनुसार पूर्वप्रधानमन्त्री डा. बाबुराम भट्टराईले आज केशरमहलस्थित सम्पत्ति छानबिन आयोगको कार्यालयमा आफ्नो सम्पत्ति विवरण बुझाउनुभएको छ,’ सचिवालयले भनेको छ।

डा. भट्टराईले सुशासनप्रतिको आफ्नो प्रतिबद्धताअनुरुप सम्पत्ति विवरण बुझाएको जनाएका छन्। ‘पारदर्शिता, जवाफदेहिता र सुशासनप्रतिको आफ्नो प्रतिबद्धताअनुरूप उहाँले आवश्यक विवरण आयोगसमक्ष पेश गर्नुभएको हो,’ सचिवालयले भनेको छ।

सरकारले गठन गरेको आयोगले सम्पत्ति छानबिनका लागि विवरण मागिरहेको छ। सरकारले २०६२/६३ सालयताका उच्चपदस्थ पदाधिकारीको सम्पत्ति छानबिन गर्न आयोग गठन गरेको थियो।

वर्तमान सरकारका सदस्यको सम्पत्ति छानबिन नगर्ने भएपछि आयोग विवादित बनेको छ। यसविरुद्ध सर्वोच्च अदालतमा पनि रिट परेका छन्।