प्रेमप्रसादले आत्महत्या गर्दा राज्यको कमजोरी देखाउने रवि लामिछाने गणेशको आत्मदाहमा चुपचाप ?

काठमाडौं । साढे तीन बर्षअघि २०७९ माघ ९ गते सङ्घीय संसद् भवन नयाँबानेश्वरअगाडि आत्मदाह प्रयास गरेका प्रेमप्रसाद आचार्यको निधन भएको २ दिनपछि रास्वपा सभापति रवि लामिछानेले तत्कालीन सरकारलाई दोषी करार गर्दै सामाजिक संजाल फेसबुकमा स्टाटस लेखेका थिए । तर, रास्वपा नेतृत्वको दुईतिहाईको सरकार गठन भएको ३ महिनामै राज्यको ज्यादतिले गर्दा गणेश नेपालीले बिहीबार राहदानी बिभागको मूलगेट अगाडि आत्मदाह गर्दा लामिछाने चुपचाप छन् ।

लामिछानेले राज्यले ज्यादति गरेकोमा माफी मागेका छैनन् । रास्वपाका सभापतिले आफ्नै पार्टीको सरकारले जरिवाना असुलीका लागि गरेको ज्यादति सहन गर्न नसकी गणेश नेपालीले आत्मदाहजस्तो आफैं आफ्नै शरीरमा आगो लगाउने परिस्थिति निम्तिएको जिम्मा लिनुपर्ने होइन भन्ने आवाज नागरिकले गर्न थालेका छन् ।

प्रेमप्रसादले त भाटभटेनी सुपरस्टोर्सले आफूसँग सामान उधारो लिएर समयमा नतिरेकाले आत्मदाहको बाटो समातेको बताएका थिए । तर गणेश नेपालीले त राज्यका निकायले ज्यादतिपूर्ण रुपमा तोकेको १० हजार जरिवाना तिर्नुपर्ने भएपछि आत्मदाहको बाटो रोजेका छन् ।

लामिछानेले त्यतिबेला एउटा नागरिकले अत्मदाह गर्नुपर्ने परिस्थितिको वर्णन गर्न अब के नै बाँकी रह्यो र भन्दै लेखेका थिए–‘एउटा नागरिकले आत्मदाह गर्नुपर्ने परिस्थितिको वर्णन गर्न अब के नै बाँकी रह्यो र । यस्तै परिस्थितिका कारण शान्त बिद्रोह गरेर हामी हिजो भर्खर राजनीतिमा र आज भर्खर सरकारमा सामेल छौं । मलाई थाहा छ, आत्मदाहको निर्णय हिजोदेखिको निराशा र पीडाको परिणाम हो । दुःख त मलाई यसमा लागेको छ कि हामी जस्ता नयाँहरुको आगमनले समेत तपाईंमा उत्साह थप्न सकेन, आशा जगाउन सकेन, आत्मदाहको निर्णय फेर्न सकेन । यसमा हामी दोषी छौं, म दोषी छु । प्रेम आचार्यजी, नयाँ राजनीतिक दल र नेताको रुपमा तपाईंमा आशा जगाउन सकिनौं, हामीलाई माफ गर्नु होला । तपाईंको आत्माले चिरशान्ति पाओस्, परिवारलाई यो पीडा सहने शक्ति मिलोस् ।’

रास्वपा नेता बालेन्द्र शाहको सरकार आएपछि इन्द्रबहादुर राईले बासस्थानबाट जबर्जस्ती लखेटेपछि आत्महत्या गरे । बिहीबारै एक महिला धोबीखोलामा हाम्फालेर मरिन् । गणेश नेपालीले आत्मदाह गरेपछि आफूले जरिवाना असुुल्न गरेको अत्याचार छोप्न उनलाई सरकारले उपचारार्थ भारत लगेको छ । तर ७० प्रतिशत भाग जलिसकेकाले उनको अवस्था चिन्ताजनक रहेको बताइन्छ ।