पोखरिया नगरपालिकाका कर्मचारीले पैसा गनिरहेको तस्वीर भाइरल, बृक्षरोपणको कमिसन लिएको आरोप

बीरगञ्ज । पर्साको पोखरीया नगरपालिकाका २ कर्मचारीको कमिसन बाँड्दै गरेको तस्वीर सामाजिक संजालमा भाइरल भएको छ । सोमबार अंकुश दैनिक अनलाइनले वृक्षरोपणमा समेत कमिसन खाएको तस्वीर राखेर समाचार लखेको थियो ।

पोखरीया नगरपालिकाका कर्मचारी कौशलकुमार झा र रामवीर चौरसियाले पैसा गनिरहेको तस्वीरसहितको समाचारले सामाजिक संजाल रंगिए पनि सरोकारवाला निकाय अख्तियार दुरुपयोग अनुसन्धान आयोगले नोटिसमा लिएको छैन ।

फोटोमा देखिएका सेतो हाफ सर्ट लगाएर बस्ने नगरपालिकका कर्मचारी कौशलकुमार झा हुन् भने नोटको बिटो गनिरहेका व्यक्ति लेखापालको जिम्मेवारी सम्हाल्दै आएका रामवीर चौरसिया हुन् । सेतो सर्ट लगाउने झा र पैसा गन्ने चौरसिया हुन् ।

बृक्षरोपण जस्तो प्रकृतिको संरक्षण गर्ने ठेक्कामा समेत उनीहरुले मोटो रकम कमिसन खाएको खुलेको छ । कार्यालयभित्रै यसरी खुलेआम कमिसनको रकम गनिएको छ । यसले उक्त नगरपालिकाभित्रको भ्रष्टाचारको कहालीलाग्दो रुप देखाएको छ । वृक्षरोपण जस्तो प्रकृतिको संरक्षण गर्ने ठेक्कामा समेत मोटो रकम कमिसन खाएको र उक्त रकम दामासाही रूपमा अन्य कर्मचारीलाई नबाँडी झा र चौरसियाले मात्रै कुम्ल्याउन खोजेपछि असन्तुष्ट पक्षले नै यो तस्बिर बाहिर ल्याइदिएका छन् ।

कमिसनको रकम दामासाहीले भागबण्डा गरिरहेको तस्वीरका बारेमा पोखरीया नगरपालिकाका कर्मचारी कौशलकुमारा झाले भने–‘एआईबाट बदनाम गरिएको हो । कमिसनको रकम भनिएको छ, तर दिने ब्यक्ति फोटोमा छैन ।’