राहदानी ठेक्का प्रकरण: आरजु राणामाथि पनि अनुसन्धान, हाजिर हुन म्याद तामेली

काठमाडौँ। अख्तियार दुरुपयोग अनुसन्धान आयोगले राहदानी छपाइको ठेक्काका विषयमा पूर्वपरराष्ट्रमन्त्री आरजु राणा देउवामाथि पनि अनुसन्धान गरिरहेको छ।

राहदानी विभागका महानिर्देशक तीर्थराज अर्यालसहित चार जनालाई पक्राउ गरेर अनुसन्धान गरिरहेको अख्तियारले आरजुलाई पनि हाजिर हुन सूचना जारी गरेको हो।

गएको मंगलबार आरजुको नाममा पनि म्याद तामेली गरिएको छ। म्याद तामेलीका लागि सुरुमा बूढानीलकण्ठस्थित जलेको र भत्काइएको घरमा पुगेको अख्तियारको टोलीले देउवाका स्वकीय समेत रहेका भानु देउवालाई म्याद बुझाएको छ।

मंगलबार अख्तियारका कर्मचारी र प्रहरी बूढानीलकण्ठस्थित देउवाको घर रहेको स्थानमा पुगेका थिए। तर त्यहाँ म्याद तामेल गर्न कसैलाई पनि नभेटेपछि भानु देउवालाई बूढानीलकण्ठ नगरपालिका वडा नं २ का वडाध्यक्ष राजेन्द्र श्रेष्ठले फोन गरेका थिए।

उनले म्याद तामेलीबारे जानकारी गराएपछि भानुले आफूलाई पत्र पठाइदिनु भन्दै म्याद बुझिदिने बताएपछि उनैलाई पत्र दिएको थियो।

पत्रमा राहधानी छपाइको विषयमा अनुसन्धान भइरहेको र त्यस विषयमा थप बुझ्न आवश्यक देखिएको भन्दै हाजिर हुन भनिएको छ। तर आरजु भने पति शेरबहादुर देउवासहित हङकङमा रहेको बताइएको छ।

राहदानी छपाइको ठेक्का प्रक्रिया गर्दा आरजू परराष्ट्रमन्त्री थिइन्। मिलेमतोमा बढी मुल्यमा ठेक्का दिएर भ्रष्टाचार गरेको आरोपमा अख्तियारले अनुसन्धान गरिरहेको छ।