दुर्गम क्षेत्रका नागरिकलाई लक्षित गरी बजेट सुधार गर्न रास्वपा सांसद मगरको माग

काठमाडौँ । राष्ट्रिय स्वतन्त्र पार्टीकी सांसद इन्दिरा राना मगरले जनजीवनमा प्रत्यक्ष प्रभाव पार्ने योजना र पूर्वाधारलाई समेट्ने गरी बजेट पुनरावलोकन गर्न सरकारसँग आग्रह गरेकी छन् ।

बुधबार प्रतिनिधि सभाको बैठकमा बोल्दै सांसद मगरले आर्थिक स्रोतको विनियोजन गर्दा कठिन भौगोलिक अवस्था भएका क्षेत्रका नागरिकको आवश्यकतालाई प्राथमिकतामा राख्नुपर्ने बताइन् ।

उनले अर्थमन्त्री डा. स्वर्णिम वाग्लेको ध्यानाकर्षण गराउँदै झापा मात्र नभई जुम्ला, हुम्लालगायत दुर्गम क्षेत्रका नागरिकले भोगिरहेका समस्या समाधान हुने गरी बजेट व्यवस्थापन गर्नुपर्ने धारणा राखिन् ।

सडक पूर्वाधारको अभावका कारण विभिन्न स्थानका बासिन्दाले दैनिक आवतजावतमा जोखिम र अतिरिक्त समय खर्च गर्नुपरेको उल्लेख गर्दै सांसद मगरले यस्ता योजनामा सरकारले आवश्यक लगानी गर्न ढिलाइ गर्न नहुने बताइन् ।

उनले इलामको बतासे क्षेत्र हुँदै मदन भण्डारी राजमार्गसँग जोडिने सडक निर्माण भए करिब ५ सय घरधुरीलाई सहज हुने उल्लेख गरिन् । हाल उक्त क्षेत्रका नागरिकले लामो दूरी तय गरी फिक्कल हुँदै यात्रा गर्नुपर्ने अवस्था रहेको भन्दै छोटो र सुरक्षित मार्ग निर्माणका लागि बजेट आवश्यक रहेको उनको भनाइ थियो ।

सांसद मगरले जनताको दैनिकीसँग जोडिएका तथा जोखिम घटाउने पूर्वाधार योजनालाई बजेटमा पर्याप्त स्थान दिनुपर्नेमा जोड दिइन् ।