भारतसँग चिया निर्यातमा देखिएको समस्या तत्काल समाधान गर्न संसादहरुको माग

काठमाडौँ । नेपाली कम्युनिस्ट पार्टी (नेकपा) राष्ट्रिय सभाकी सांसद जयन्तीदेवी राईले भारतसँग देखिएको चिया निर्यातसम्बन्धी समस्या तत्काल समाधान गर्न सरकारसँग माग गरेकी छिन्।

उनले सोमबार राष्ट्रिय सभा बैठकमा बोल्दै चियासहित नेपाली किसानको उत्पादन निर्यातमा देखिएका सबै समस्या समाधान हुने गरी उपयुक्त विकल्प तय गर्न सरकारलाई सचेत गराएकी हुन्।

उनले भारततर्फको निर्यात ठप्प हुँदा नेपालका चिया उद्योगहरू बन्द हुने अवस्थामा पुगेकाले सरकारले उक्त समस्या समाधानका लागि तत्काल भारत सरकारसँग वार्ता गर्नुपर्नेमा जोड दिइन्।

नेपाली चिया किसान र उद्योगले भोग्नुपरेको सास्तीबारे संसद्मा बोल्दै उनले भनिन्, ‘नेपालमा चिया उद्योग बन्द हुने अवस्थामा छ। १२ लाख किलो भन्दा बढी चिया भारतमा निर्यात नहुँदा बिक्री नहुने अवस्थामा छ। पटक पटक भारतले क्वालिटी टेस्ट गर्ने भनेर लैजाने, फेरि १५, २० दिनसम्म नगर्ने अनि यस्तो अप्ठ्यारो बनाइरहने, यति बेला उत्पादन भएको चिया पनि नष्ट हुने अवस्था हुँदाहुँदै अहिले यो स्थितिमा गुज्रिरहेको छ। त्यस कारण म सम्माननीय सरकारको गम्भीर ध्यानाकर्षण गराउन चाहन्छु कि सबैभन्दा पहिले भारतीय सरकारसँग यो व्यापारको बारेमा डाइलग होस्। र भारत मात्रै होइन, अरू देशहरूसँग पनि चिया मात्रै नभएर अरू किसानको उत्पादनहरू पनि बिक्री गर्ने विकल्पहरू खोजियोस्। किसानहरूको उत्पादनको बजारको सुनिश्चित गरियोस्। उनीहरूलाई आत्मनिर्भर बनाउने काम गरियोस्।