रविको पहलमा हट्यो संसदको गतिरोध

काठमाडौं । प्रतिनिधि सभा बैठकको अवरोध हटेको छ । प्रधानमन्त्री बालेन शाहले दिएको सीमासम्बन्धी विवादित अभिव्यक्तिबारे परराष्ट्रमन्त्री शिशिर खनालले स्पष्टिकरण दिने सहमति भएसँगै प्रतिनिधि सभाको बैठक सुचारु भएको हो ।

प्रतिपक्षी दल श्रम संस्कृति पार्टीले भने प्रधानमन्त्री स्वयंले सभामा आएर स्पष्टिकरण दिनुपर्ने माग गरेको छ ।

श्रम संस्कृतिका अध्यक्ष हर्क साम्पाङले प्रधानमन्त्री स्वयं उपस्थित भएर आफ्नो धारणा राख्नुपर्ने भन्दै अरू मन्त्रीमार्फत जवाफ दिनु न्यायसंगत तथा संविधानसम्मत नभएको बताए ।

उनले प्रधानमन्त्री उपस्थित हुन नसक्ने अवस्थामा आफ्नो धारणा लिखित रूपमा पठाउनुपर्ने भन्दै गल्ती एक जनाले गर्ने र अर्कोले त्यसको बचाउ वा सच्याउने अभ्यास स्वीकार्य नहुने बताए ।

प्रधानमन्त्री बालेनले जेठ १७ गते संसदको रोष्टममा उभिएर भारतले मात्र नभई नेपालले पनि भारतको भूमि मिचेको विवादित अभिव्यक्ति दिएका थिए । त्यसयता विपक्षी दलहरुले निरन्तर संसद अवरोध गर्दै आएका थिए । अहिले संसद बैठकमा परराष्ट्रमन्त्री खनालले प्रधानमन्त्रीका तर्फबाट स्पष्टिकरण दिइरहेका छन् ।