परराष्ट्र मन्त्री खनाल नयाँ दिल्ली प्रस्थान, उच्चस्तरीय भेटवार्ता तय

काठमाडौँ । परराष्ट्र मन्त्री शिशिर खनाल भारतको औपचारिक भ्रमणका लागि नयाँ दिल्ली प्रस्थान गरेका छन्। भारतीय विदेश मन्त्री एस। जयशंकरको मैत्रीपूर्ण निमन्त्रणामा सुरु भएको उक्त भ्रमण आइतबारसम्म जारी रहने परराष्ट्र मन्त्रालयले जनाएको छ।

मन्त्रालयका अनुसार भ्रमणका क्रममा परराष्ट्र मन्त्री खनालले भारतीय विदेश मन्त्री डा. जयशंकरसँग औपचारिक भेटवार्ता गर्ने कार्यक्रम छ। उक्त भेटमा दुई देशबीचको व्यापार, लगानी, ऊर्जा सहकार्य, भौतिक सम्पर्क सञ्जाल विस्तार तथा जनस्तरका सम्बन्धसहित आपसी हितका विविध विषयमा छलफल हुने अपेक्षा गरिएको छ।

नेपाल-भारत सम्बन्धको निरन्तर उच्चस्तरीय संवाद प्रक्रियाअन्तर्गत हुने यो भ्रमणले दुई देशबीचको दीर्घकालीन तथा बहुआयामिक साझेदारीलाई थप मजबुत बनाउन योगदान पुग्ने विश्वास गरिएको मन्त्रालयले जनाएको छ। परराष्ट्र मन्त्री खनाल जेठ २४ गते स्वदेश फर्किने कार्यक्रम तय भएको छ।

भ्रमणका सन्दर्भमा मन्त्री खनालले नागरिकको परिवर्तनप्रतिको अपेक्षा क्रमशः बढ्दै गएको उल्लेख गर्दै त्यसलाई सम्बोधन गर्न सरकार, निजी क्षेत्र, विकास साझेदार तथा अन्य सरोकारवाला निकायबीच समन्वय र सहकार्य अपरिहार्य रहेको धारणा व्यक्त गरेका छन्।

यसैबीच, भारतमा रहेका राष्ट्रिय स्वतन्त्र पार्टी ९रास्वपा० का सभापति रवि लामिछाने पाँच दिने भ्रमण सम्पन्न गरी आज स्वदेश फर्किने कार्यक्रम रहेको छ।