कुशल भुर्तेलको कीर्तिमानी प्रर्दशनमा मलेसिया बिरुद्ध नेपालको सानदार जित 

काठमाडौँ। ओपनर कुशल भुर्तेलको कीर्तिमानी प्रर्दशनमा मलेसियालाई पराजित गर्दै नेपाली राष्ट्रिय क्रिकेट टोली समूह विजेताको रुपमा एसियन गेम्स छनोटको सेमिफाइनलमा प्रवेश गरेको छ।

बिहीबार भएको खेलमा मलेसियामाथि १६७ रनको फराकिलो जित निकाल्दै नेपाली टोली समूह ‘ए’को विजेताको रुपमा सेमिफाइनलमा पुगेको हो। नेपालसँग हारका बाबजुद पनि मलेसियाले समूह उपविजेताको रुपमा अन्तिम चारमा स्थान पक्का गरेको छ। समूह चरणको आफ्नो पहिलो खेलमा चीनलाई हराएका नेपाल र मलेसियाले यसअघि नै एसियन गेम्समा स्थान बनाइसकेका छन्।

बिहीबार नेपालले दिएको २७६ रनको विशाल लक्ष्य पछ्याएको मलेसियाले निर्धारित ओभरमा नौ विकेटको क्षतिमा १०८ रन मात्र बनाउन सक्यो।

मलेसियालाई कम स्कोरमा रोक्न शेर मल्लले तीन विकेट लिए। उनले आफ्नो स्पेलमा १४ रन खर्चे।

त्यसअघि सिंगापुर नेशनल क्रिकेट मैदानमा मलेसियाले टस जितेर फिल्डिङ रोजेपछि ब्याटिङ गरेको नेपालीले निर्धारित २० ओभरमा सात विकेटको क्षतिमा २७५ रनको विशाल योगफल तयार पारेको थियो।

नेपालका लागि ओपनर कुशल भुर्तेलले कीर्तिमानी प्रदर्शन गरे। मलेसियाविरुद्ध शतक प्रहार गरेका कुशल टी–२० आई मा नेपालका लागि लगातार दोस्रो शतक हान्ने पहिलो खेलाडी बने। कुशलले ४४ बलमा शतक पूरा गरे। उनले ४४ बलमा १० चौका र ७ छक्का सहयोगमा शतक पूरा गरेका थिए।