अन्तरराष्ट्रिय सम्बन्धमार्फत विकास र लगानी प्रवर्द्धनमा सरकारको प्रतिबद्ध छ: परराष्ट्रमन्त्री

काठमाडौँ । परराष्ट्रमन्त्री शिशिर खनाल ले नेपालको अन्तरराष्ट्रिय सम्बन्धलाई विकास, आर्थिक समृद्धि र राष्ट्रिय हित प्रवर्द्धनका लागि प्रभावकारी रूपमा उपयोग गर्न सरकार प्रतिबद्ध रहेको बताएका छन् ।

राष्ट्रिय स्वतन्त्र पार्टी रास्वपा टोखा नगरपालिका–९ ले आज आयोजना गरेको कार्यक्रममा मन्त्री खनालले नेपालको कूटनीतिक सम्बन्ध विभिन्न मुलुक तथा अन्तरराष्ट्रिय संस्थासँग आर्थिक, सांस्कृतिक र रणनीतिक सहकार्यमा आधारित रहेको उल्लेख गरे। उनले नेपालले संविधान, संयुक्त राष्ट्रसङ्घको बडापत्र, पञ्चशीलको सिद्धान्त तथा असंलग्न आन्दोलनका मूल्य–मान्यताअनुसार स्वतन्त्र र सन्तुलित परराष्ट्र नीति अवलम्बन गर्दै आएको बताए ।

उनका अनुसार नेपालको परराष्ट्र नीतिको मुख्य उद्देश्य राष्ट्रिय हितको संरक्षण, आर्थिक विकास, शान्ति तथा अन्तरराष्ट्रिय सहकार्यलाई सुदृढ बनाउनु हो ।

मन्त्री खनालले परराष्ट्र मन्त्रालयभित्र हुने ढिलासुस्ती अन्त्य गरी नागरिकलाई छिटो र सहज सेवा दिन सुधारका काम अघि बढाइएको जानकारी दिए। राहदानी वितरण प्रक्रिया सरल बनाइएकाले पहिले हप्तौँ लाग्ने सेवा अहिले दुई–तीन दिनभित्रै उपलब्ध हुन थालेको उहाँको भनाइ थियो ।

विदेशमा रहेका नेपालीका समस्या समाधानका लागि ‘मोफा मित्र’ मोबाइल एप सार्वजनिक गरिएको उल्लेख गर्दै उनले समस्यामा परेका नेपालीले एपमार्फत सिधैँ गुनासो दर्ता गर्न सक्ने र त्यसको अनुगमन मन्त्रीस्तरबाटै हुने व्यवस्था मिलाइएको बताइ ।

उनले सरकारले सार्वजनिक गरेको ‘१०० बुँदे प्रतिबद्धता पत्र’ अनुसार काम भइरहेको जनाउँदै २०६३ पछि महत्वपूर्ण सार्वजनिक पदमा रहेका व्यक्तिको सम्पत्ति छानबिन तथा पुराना भ्रष्टाचारका फाइल खोल्ने प्रक्रिया अघि बढाइएको जानकारी दिए। फजुल खर्च नियन्त्रण गर्न मन्त्रालयको संख्या घटाइएको पनि उनले बताए।

गोँगबु क्षेत्रमा जमिनमुनिको पानीको सतह घट्दै गएकोप्रति चिन्ता व्यक्त गर्दै मन्त्री खनालले शिवपुरी जलाधार क्षेत्रको पानी व्यवस्थापनका लागि स्थानीय तहसँग समन्वय भइरहेको जानकारी दिए। साथै, चक्रपथ विस्तारका लागि चीनसँग सम्झौता भइसकेकाले अब निर्माण कार्यले गति लिने र गोँगबु क्षेत्रको अव्यवस्थित पार्किङ हटाउन ट्राफिक प्रहरीसँग सहकार्य गरी काम सुरु गरिने उनले बताए ।

कार्यक्रममा टोखा नगरपालिका–९ का वडाध्यक्ष रामभक्त घिमिरे ले सङ्घीय सरकारसँगको सहकार्यमा गोँगबु–टोखा क्षेत्रका समस्या समाधानका लागि पहल भइरहेको बताए ।