क्यान नेतृत्वमाथि लागेको आरोपबारे राखेपले माग्यो ५ दिनभित्र जवाफ

काठमाडौँ । राष्ट्रिय खेलकुद परिषद् (राखेप)ले नेपाल क्रिकेट संघ (क्यान)का अध्यक्ष चतुरबहादुर चन्द विरुद्ध परेका उजुरीका विषयमा पाँच दिनभित्र विस्तृत जवाफ पेश गर्न निर्देशन दिएको छ ।

राखेपले क्यानलाई पठाएको पत्रमार्फत अध्यक्ष चन्दसँग सम्बन्धित विभिन्न आरोपबारे तथ्यगत राय, प्रतिक्रिया तथा प्रमाणित कागजात उपलब्ध गराउन भनेको हो । परिषद्का अनुसार अख्तियार दुरुपयोग अनुसन्धान आयोगमा दर्ता भएको उजुरीका आधारमा आवश्यक विवरण माग गरिएको जनाएको छ ।

उजुरी २०८३ वैशाख १६ गते अख्तियार दुरुपयोग अनुसन्धान आयोग मा दर्ता भएको बताइएको छ । त्यसपछि आयोगले वैशाख २९ गते युवा तथा खेलकुद मन्त्रालय लाई पत्राचार गरेको थियो । मन्त्रालयले सोही विषयमा वैशाख ३१ गते राखेपलाई आवश्यक प्रक्रिया अघि बढाउन र १० दिनभित्र प्रतिवेदन उपलब्ध गराउन निर्देशन दिएको थियो ।

मन्त्रालयमार्फत प्राप्त विवरणअनुसार क्यानका अध्यक्ष, कोषाध्यक्ष तथा अन्य पदाधिकारीमाथि पदीय अधिकारको दुरुपयोग गरी सार्वजनिक स्रोतको अनियमित प्रयोग गरेको आरोप उल्लेख गरिएको छ । साथै, अमेरिकामा सम्पन्न विश्वकप भ्रमण व्यवस्थापन, कर्मचारी नियुक्ति प्रक्रिया, अपांगता भत्ता वितरण, वार्षिक साधारण सभा सञ्चालन, विश्वकप जर्सी तथा टिकट व्यवस्थापनसँग सम्बन्धित विषयमा समेत अनियमितता भएको दाबी उजुरीमा समावेश रहेको जनाइएको छ ।

राखेपले गत बिहीबार क्यानलाई पठाएको पत्रमा उजुरीमा उठाइएका सबै बुँदामा स्पष्ट र बुँदागत जवाफ दिन आग्रह गरेको छ । परिषद्ले उपलब्ध गराइने कागजात तथा विवरण प्रमाणित र तथ्यमा आधारित हुनुपर्ने उल्लेख गर्दै पछि फरक नपर्ने गरी विवरण पेश गर्न निर्देशन दिएको जनाएको छ ।