पूर्वराजा ज्ञानेन्द्र शाह पोखरामा, विमानस्थलमा समर्थकहरूको भब्य स्वागत

काठमाडौँ । पूर्वराजा ज्ञानेन्द्र शाह शुक्रबार पोखरा पुगेका छन्। उनको आगमनका क्रममा समर्थकहरू पोखरा विमानस्थलमा भेला भई स्वागत गरेका छन्।

विमानस्थल क्षेत्रमा बाजागाजासहित उपस्थित समर्थकहरूले स्वागत कार्यक्रम गरेका थिए। सो क्रममा केही समूहले राजसंस्थाको पक्षमा तथा वर्तमान व्यवस्थाविरुद्ध नाराबाजी समेत गरेका जनाइएको छ।

लोकतन्त्र दिवसकै दिन शाह पोखरा पुगेका हुन्। उनी पोखरामा हालै सञ्चालनमा आएको सोल्टी होटेलमा बस्ने कार्यक्रम रहेको बताइएको छ।

सुरक्षा स्रोतका अनुसार शाह कम्तीमा दुई सातासम्म पोखरामा रहने प्रारम्भिक कार्यक्रमसहित त्यहाँ पुगेका हुन्। बसाइँ अवधिमा उनले विभिन्न स्थानको अवलोकन गर्नुका साथै भेटघाट कार्यक्रमसमेत गर्ने तयारी रहेको छ।

पोखरा भ्रमण व्यवस्थापन समितिसँग आबद्ध अर्जुन खनालले यस पटकको भ्रमणलाई विशेष महत्वका साथ हेरिएको बताएका छन्। उनका अनुसार लामो बसाइँसहितको यस भ्रमणले राजनीतिक सन्देशसमेत दिने अपेक्षा गरिएको छ।

यसअघि २०८१ माघ २७ गते पनि शाह पोखरा पुगेका थिए। त्यतिबेला करिब दुई साताको बसाइँपछि काठमाडौँ फर्कँदा उनका समर्थकहरूले विमानस्थल क्षेत्रमा ठूलो संख्यामा उपस्थित भई स्वागत गरेका थिए।