श्रम स्वीकृति सेवा दुरुपयोग हुने प्रचार तत्काल हटाउन विभागको कडा निर्देशन, कारवाहीको चेतावनी

काठमाडौँ । वैदेशिक रोजगारीसम्बन्धी श्रम स्वीकृति सेवाको नाममा गलत र भ्रमपूर्ण प्रचार-प्रसार गर्ने गतिविधि रोक्न वैदेशिक रोजगार विभागले कडा निर्देशन जारी गरेको छ।

विभागले साइबर सेन्टर, तालिम संस्था तथा अन्य निजी निकायहरूलाई लक्षित गर्दै यस्ता गतिविधि तत्काल बन्द गर्न र प्रचार सामग्री हटाउन समयसीमा तोकेको छ।

विभागका अनुसार कार्यालय आसपास तथा अन्य स्थानमा रहेका केही साइबर सेन्टर र इन्स्टिच्युटहरूले “श्रम स्वीकृति गरिन्छ”, “श्रम सम्बन्धी फारम भरिन्छ” वा “श्रम अनलाइन सेवा उपलब्ध छ” जस्ता दाबी गर्दै सेवाग्राहीलाई आकर्षित गर्ने, भ्रममा पार्ने र आर्थिक असुली गर्ने गुनासो बढेको छ।

सार्वजनिक सूचना जारी गर्दै विभागले श्रम स्वीकृति सम्बन्धी सम्पूर्ण प्रक्रिया प्रचलित कानुनअनुसार केवल विभाग वा तोकिएका श्रम तथा रोजगार कार्यालयमार्फत मात्र हुने स्पष्ट पारेको छ। यसबाहेक अन्य निकायले यस्तो सेवा प्रदान गर्छु भन्ने गरी प्रचार गर्नु गैरकानुनी हुने पनि विभागले जनाएको छ।

विभागले यस्ता गलत सूचनामूलक बोर्ड, होर्डिङ, फ्लेक्स तथा भित्ते लेखन सोमबारभित्र हटाइसक्न सम्बन्धित व्यवसायी तथा संस्थालाई निर्देशन दिएको छ। तोकिएको समयसीमा पालना नगरे कानुनअनुसार कारबाही प्रक्रिया अघि बढाइने चेतावनीसमेत दिइएको छ।