नेपालफेस समाचार प्रभावः रातो नम्बरका गाडी सेतो नम्बर प्लेट बनाउन महानगरको निर्देशन

काठमाडौं । काठमाडौं महानगरपालिकाका दुई विभागीय प्रमुखले रातो नम्बर प्लेट राखेर प्रयोग सरकारी सवारीसाधन प्रयोग गरेको समाचार नेपालफेसले मंगलबार बिहान प्रकाशित गरेपछि एउटा गाडीमा सेतो नम्बर राख्न प्रशासनले निर्देशन दिइसकेको छ । अर्को गाडी आयोजनाको भएकाले अझै पनि रातो नम्बर प्लेटमै रहेको छ ।

योजना, अनुगमन तथा मूल्यांकन एकाई प्रमुख सुमित्रा लामिछाने सुवेदीले प्रयोग गरिरहेको बा १२ च १४१ नम्बरको गाडीमा सेतो नम्बर प्लेट राख्नका लागि पठाइसकिएको महानगर स्रोतले बताएको छ ।

स्रोतका अनुसार वातावरण बिभागकी प्रमुख सरिता राईले आफूले प्रयोग गरिरहेको गाडीको अझै पनि सेतो नम्बर परिवर्तन गर्न आनाकानी गरिरहेकी छन् । उनले प्रयोग गर्दैआएको २६४४ नम्बरको सरकारी गाडी महानगर अन्तर्गतकै चःमती जग्गा एकीकरण आयोजनाको हो ।

महानगरका दुबै अधिकारीले सुरक्षाका कारण देखाउँदै सरकारी गाडी रातो (निजी) नम्बर प्लेट राखेर सञ्चालन गर्दैआएका थिए ।

महानगरको सेतो नम्बर प्लेटको गाडीमा रातो नम्बरप्लेट राखेकाले शनिबार र अन्य सार्वजनिक बिदाका दिन राई र लामिछाने ढुक्कका साथ घुमघाममा समेत जाने गरेको आरोप लाग्दैआएको छ । महानगरको गाडी र इन्धनको दुरुपयोग यसरी गर्न उनीहरुले वालेन्द्र शाह मेयर हुँदादेखि नै पाउँदैआएका छन् ।