ओलीकै कारण पार्टीमा वितण्डा मच्चियोः माधव नेपाल

 काठमाडौं । नेकपा एमालेको माधव नेपाल–झलनाथ खनाल पक्षको राष्ट्रिय कार्यकर्ता भेला जारी छ । भेलालाई सम्बोधन गर्दै एमालेका बरिष्ठ नेता तथा पूर्वप्रधानमन्त्री माधवकुमार नेपालले अहिलेको समस्याको मूल कारण पार्टी अध्यक्ष केपी शर्मा ओली नै भएको बताएका छन् ।

ओलीको अहंकार र व्यक्तिवाद, गुटगत मनोवृत्ति, भजन गर्नेहरु जम्मा गर्ने चाहनाले पार्टी समस्यामा परेको नेता नेपालको भनाइ छ ।

‘ओलीको ब्यक्तिवादी मनोवृत्तिले गर्दा एमाले र माओवादी केन्द्रबीचको एकता भाँडियो’ नेता नेपालले भने, ओलीमा आलोचना र सुझाव नसुन्ने प्रवृत्ति रहेको र जबजको नारा लगाएर निरंकुश प्रवृत्ति देखाएको आरोप लगाए ।

बरिष्ठ नेता नेपालले प्रधानमन्त्री एवं पार्टी अध्यक्ष केपी शर्मा ओलीकै कारण पार्टीमा वितण्डा मच्चिएको बताएका छन् ।

बुधबार एमालेको खनाल–नेपाल समूहले सानेपामा गरेको राष्ट्रिय कार्यकर्ता भेलालाई सम्बोधन गर्दै वरिष्ठ नेता नेपालले पार्टीभित्र भएको विग्रह र वितण्डाको जिम्मा ओलीले नै लिनु पर्ने बताएका छन् । उनले ओलीकै कारण पार्टीमा वितण्डा मच्चिएको र पार्टी विभाजन र विसर्जनको दिशामा पुगेको आरोप लगाए ।