१ नम्बर प्रदेशसभाको बैठक अनिश्चितकालका लागि स्थगित

काठमाडौं । सर्वोच्च अदालतको फैसलाले एमाले–माओवादी केन्द्र पुनस्र्थापित भएपछि विकसित राजनीतिक परिदृश्यपछि १ नम्बर प्रदेशसभाको बैठक पनि अनिश्चितकालका लागि स्थगित भएको छ ।

प्रदेश सभाका सचिव गोपालप्रसाद पराजुलीले आइतबार अनिश्चितकालका लागि बैठक स्थगित भएको सूचना टाँसेका छन् ।

 गएको पुस १० मा प्रधानमन्त्री केपी ओलीले प्रतिनिधिसभा बिघटन गरेपछि १ नम्बर र बागमती प्रदेशका सरकारबिरुद्ध अविश्वास प्रस्ताव दर्ता भएका थिए । ती अविश्वास प्रस्ताव दर्ता भए पनि तत्कालीन नेकपाको ओली समूहले टेबुल गर्नबाट रोकेका थिए । १ नम्बर प्रदेशमा बल्लतल्ल टेबुल भए पनि त्यसपछि अगाडि बढ्न सकेको थिएन ।

फागुन २३ को सर्वोच्चको फैसलाले एमाले र माओवादी केन्द्र ब्यूँतिएपछि आजका लागि पूर्वनिर्धारित बैठक अनिश्चितकालका लागि स्थगित भएको छ । एकता खारेज नहुँदासम्म माधव–प्रचण्ड समूहले मुख्यमन्त्री राईका बिरुद्ध अविश्वास प्रस्ताव दर्ता गरेका थिए । एकता खारेज भएपछि एमालेकै बहुमत भएकाले मुख्यमन्त्री राई सुरक्षित जोनमा छन् । बागमती प्रदेशसभामा पनि एमालेकै बहुमत रहेको छ ।