सर्लाहीमा तीन मतदान केन्द्र पूर्णरूपमा महिला कर्मचारीको जिम्मामा

सर्लाही । फागुन २१ गते हुने प्रतिनिधिसभा सदस्य निर्वाचनलाई लक्षित गर्दै सर्लाहीमा तीन वटा मतदान केन्द्र पूर्णरूपमा महिला कर्मचारीमार्फत सञ्चालन गरिने भएको छ । नेतृत्व तहदेखि कार्यालय सहयोगीसम्म सबै जिम्मेवारी महिलाले सम्हाल्ने गरी तयारी गरिएको निर्वाचन अधिकृतको कार्यालयले जनाएको छ ।

निर्वाचन अधिकृत टीकाबहादुर थापाका अनुसार क्षेत्र नम्बर १ अन्तर्गत लालबन्दी नगरपालिकाका वडा नम्बर १० स्थित आधारभूत विद्यालय चन्द्रपुर (क) र (ख) तथा वडा नम्बर ८ स्थित नगरपालिकाको नयाँ भवन (ख) मतदान केन्द्रमा सम्पूर्ण जिम्मेवारी महिला कर्मचारीलाई दिइएको छ ।

उनले यसलाई केवल प्राविधिक अभ्यास नभई नेतृत्वमा महिलाको क्षमता र विश्वसनीयता प्रदर्शन गर्ने प्रयासका रूपमा व्याख्या गरे । स्थानीय तहका कर्मचारी, विद्यालयका शिक्षिका, बैंक तथा सरकारी कार्यालयमा कार्यरत महिला जनशक्तिलाई परिचालन गरी मतदान प्रक्रिया सञ्चालन गरिने तयारी छ ।

ती मतदान केन्द्र निर्वाचन अधिकृतको कार्यालय नजिकै रहेकाले व्यवस्थापन, समन्वय र अनुगमनमा सहज हुने विश्वास गरिएको छ ।

कार्यालयले निर्वाचनको संवेदनशीलता ख्याल गर्दै शान्तिपूर्ण, सुरक्षित र मतदातामैत्री वातावरण सुनिश्चित गर्न तालिमप्राप्त तथा सक्षम जनशक्ति खटाइएको दाबी गरेको छ ।

यसैबीच, वडा नम्बर १३ पत्थरकोटस्थित कुशेश्वर आधारभूत विद्यालय छेडा ९ख० मतदान केन्द्रमा भने शिक्षकहरूलाई मात्र जिम्मेवारी दिइएको छ । यसले मतदान प्रक्रियामा शैक्षिक जनशक्तिको भूमिकालाई समेत उजागर गरेको कार्यालयको भनाइ छ ।

जिल्ला निर्वाचन कार्यालयका अनुसार सर्लाहीमा निर्वाचनका लागि कुल ३ हजार ७६८ कर्मचारी परिचालन गरिनेछन् । मतदान अधिकृत तथा सहायक मतदान अधिकृतलाई आवश्यक तालिम प्रदान गरिसकिएको जनाइएको छ ।