आयल निगमले चुनाव लक्षित गर्दै ग्यास आयात बढायो, एकै दिन १३८ बुलेट भित्रियो

काठमाडौँ । आसन्न निर्वाचन अवधिमा आपूर्ति व्यवस्थामा अवरोध नआओस् भन्ने उद्देश्यले नेपाल आयल निगमले खाना पकाउने एलपी ग्यासको आयात परिमाण उल्लेख्य रूपमा वृद्धि गरेको जनाएको छ। निगमका अनुसार सम्भावित माग वृद्धिलाई ध्यानमा राखी देशव्यापी वितरण प्रणालीलाई सुदृढ बनाउने कदम चालिएको हो।

निगमका कार्यकारी निर्देशक चण्डिकाप्रसाद भट्टले भारतीय आपूर्तिकर्ता इन्डियन आयल कर्पोरेसन मार्फत यस वर्षकै उच्च परिमाणमा ग्यास लोड भई मंगलबार नेपालतर्फ पठाइएको जानकारी दिएका छन्। सो दिन विभिन्न डिपोबाट कुल १३८ बुलेट ग्यास लोड भएको र उक्त परिमाण करिब १ लाख ७३ हजार ८०० घरायसी सिलिन्डर बराबर हुने निगमले स्पष्ट पारेको छ।

निगमका तथ्यांक अनुसार भारतका विभिन्न भण्डारण केन्द्रमध्ये बरौनी बाट ३६ बुलेट, मथुरा बाट ३६, पारादीप बाट ४०, दुर्गापुर बाट २४ तथा हल्दिया बाट २ बुलेट ग्यास नेपालका लागि पठाइएको हो।

कार्यकारी निर्देशक भट्टले निर्वाचन अवधिमा उपभोक्तालाई ग्यास अभावको समस्या नपरोस् भन्ने लक्ष्यसहित आयात व्यवस्थापन नियमित गरिएको उल्लेख गरे। उनले आपूर्ति प्रणालीलाई सहज राख्न निगम सतर्क रहेको र निर्वाचनको समयमा पनि उपभोक्ताले सामान्य रूपमा ग्यास प्राप्त गर्ने विश्वास व्यक्त गरेका छन्।