गृहमन्त्री बादलसहित ५ मन्त्रीको सांसद पद धरापमा, माओवादीले सोध्यो २४ घन्टे स्पष्टीकरण

काठमाडौं । प्रधानमन्त्री केपी ओलीले आफूपक्षीय केन्द्रीय सदस्यहरुलाई बोलाएर शुक्रबार बालुवाटारमा राखेको बैठकले थप गरेका २३ केन्द्रीय सदस्यहरुलाई माओवादी केन्द्रले स्पष्टीकरण सोधेको छ । शनिबार बसेको माओवादी केन्द्रको बैठकले २३ नेतालाई २४ घण्टे स्पष्टीकरण सोधेको छ ।

ती २३ नेतालाई २४ घण्टाभित्र पार्टीमा फर्किने वा दलत्याग के गर्ने भन्नेबारे जानकारी दिन निर्देशन दिएको हो । उनीहरुले २४ घण्टाभित्र त्यसबारे जानकारी नदिएमा कारबाहीको प्रक्रिया अघि बढाउने भएको छ । 

शुक्रबार ओली समूहको केन्द्रीय समिति बैठकले गृहमन्त्री रामबहादुर थापा बादल, ऊर्जामन्त्री टोपबहादुर रायमाझी, सहरी विकास मन्त्री प्रभु साह, उद्योग मन्त्री लेखराज भट्ट, श्रममन्त्री गौरीशंकर चौधरी र युवा तथा खेलकुद मन्त्री दावा लामा, खानेपानी मन्त्री मणि थापासहित २३ पूर्वमाओवादी खेमाबाट आएकालाई  केन्द्रीय सदस्यहरु मनोनीत गरेको थियो । माओवादीले कारबाही प्रक्रिया अगाडि बढाएमा यी मन्त्रीको सांसद पद कायम हुनसक्दैन ।  सांसद नभए पनि ६ महिना मन्त्री पदमा रहने कानुनी ब्यवस्था छ । ६ महिनापछि सांसद नभए मन्त्री हुन पाइँदैन ।

ओली पक्षको बैठकले पूर्व माओवादीको कोटाबाट ६ मन्त्रीबाहेकका १७ जनालाई केन्द्रीय सदस्यमा मनोनीत गरेको छ ।  मनोनीत हुनेहरुमा टंक आङबुहाङ, पासाङ शेर्पा, ज्वाला साह, टेकबहादुर बलामी, कमल जंग, मनोज थापा, विषमलाल अधिकारी, लीलाबहादुर थापा, दधिराम न्यौपाने, दिनेश पन्थी, नवीन रोका, धर्मराज रेग्मी, डम्बर विष्ट, झपट बोहरा र चन्द्रबहादुर खड्का छन् । यीमध्ये आङबुहाङ केही दिनअघिमात्र ओली क्याम्पमा प्रवेश गरेका हुन् । उनी ताप्लेजुङबाट प्रदेश सभा सांसद हुन् ।