जसपा विभाजनको निवेदन पर्नासाथ निर्णय दिने तयारीमा निर्वाचन आयोग

काठमाडौं । नेपाल कम्युनिष्ट पार्टी बिभाजन भएको अढाई महिनासम्म पनि अनिर्णयको बन्दी बनेको निर्वाचन आयोग जनता समाजवादी पार्टी(जसपा) विभाजनको निवेदन पर्नासाथ निर्णय गर्न तयारी अवस्थामा छ । प्रधानमन्त्री केपी ओलीले सकेसम्म सग्लो जसपालाई ल्याएर सरकार टिकाउने, नसके महन्थ ठाकुर, राजेन्द्र महतो, शरदसिंह भण्डारी, इस्तियाक राईहरुसहितका सांसदहरु फुटाउन साम दाम दण्डभेद सबै हत्कण्डा प्रयोग गर्दैआएका छन् ।

सिंगो जसपा ओली सरकारमा आउने संभावना कम भएकाले पनि प्रधानमन्त्री ओली विभाजन गर्न तम्सिएका छन् । जे जसरी पनि जसपा फोर्न उनले भारतीय खुफिया एजेन्सी रअ को पनि सहयोग लिएका छन् । रअ ले तत्कालीन राजपालाई ओली सरकारमा सामेल गराउन चाहिरहेको छ । चुच्चे नक्साको फन्डा निकालेर ‘राष्ट्रवादी’ जामा पहिरिएका ओलीले मध्यरातमा बालुवाटारमा रअ का कर्मचारी सामन्त गोयललाई भेटेपछि उनले तीन बर्षमै प्रतिनिधिसभा बिघटन गरेका थिए । 

प्रधानमन्त्री ओली अहिले संविधान संशोधन गर्ने, जन्मकैदको संजाय पाएका रेशम चौधरीको मुद्दा फिर्ता लिने जस्ता सर्त समेत पूरा गर्न तयार भएका छन् । जसपासँग सरकार टिकाउने नाममा हिजो आफैंले राष्ट्रघाती भनेका कार्य गर्न ओली उद्यत भएर लागेका छन् ।

रअ को सहयोगमा जसपा टुक्र्याउन लागेका उनले निर्वाचन आयोगका पदाधिकारीलाई निवेदन पर्नासाथ तत्कालै दल विभाजन गर्ने निर्णय गर्न तयारी हालतमा राखेका छन् । ओलीको आदेश तामेली गर्ने प्रमुख आयुक्त थपलियाले जसपाको विभाजनको निवेदन पर्नासाथ प्रक्रिया पुगे नपुगेको समेत नहेरी निर्णय गर्ने बचनबद्धता ओलीसमक्ष प्रकट गरिसकेका छन् ।