सर्वोच्चको आदेशपछि नेकपाका सांसदको हैसियत के हुन्छ ?

काठमाडौं । सर्वोच्च अदालतले आइतबार नेपाल कम्युनिष्ट पार्टीको आधिकारिकता ऋषि कट्टेलकै पक्षमा हुने फैसला गरेपछि राजनीति तरंगित भएको छ । सर्वोच्चको फैसलासँगै केपी ओली र पुष्पकमल दाहाल ‘प्रचण्ड’ले नेतृत्व गरेको नेकपा खारेज भएको छ । दुई बर्षअघि कट्टेलले दायर गरेको मुद्दामा आइतबार सर्वोच्चका न्यायाधीशद्वय कुमार रेग्मी र वमकुमार श्रेष्ठको संयुक्त इजलासले कट्टेलको पक्षमा आदेश दिएको हो ।

सर्वोच्चको आदेशसँगै साविक नेकपा एमाले र माओवादी केन्द्रका रुपमा रहने अनुमान गरिएको छ । तर ती नाममा पनि सन्ध्या तिवारी र गोपाल किराँतीले दल दर्ता गरिसकेका छन् ।

नेकपाको आधिकारिकता सर्वोच्चले कट्टेललाई दिएपछि अब केपी ओली र प्रचण्डले नेतृत्व गरेको पार्टी अवैध भएको छ । अब नेकपामा रहेका सांसदहरु सर्वोच्चको आदेशसँगै स्वतन्त्र भएका छन् ।

सर्वोच्चको आदेशले ओली र प्रचण्डहरुलाई अलग अलग दल दर्ता गर्न बाटो खुलेको छ । अब अलग अलग दल दर्ताको प्रक्रियामा ओली र प्रचण्ड लाग्ने बिकल्प खुला भएको छ । ओली–प्रचण्डको दल खारेज भएसँगै २७३ सांसद नै स्वतन्त्र भएका छन् । निर्वाचन आयोगले ओली र प्रचण्डलाई आधिकारिकता नदिए पनि सर्वोच्चको यो आदेशसँगै दुवैलाई अलग अलग दल दर्ता गर्न बाटो खुलेको छ ।