अविश्वास प्रस्तावका बारेमा प्रचण्ड–नेपाल समूहद्वारा सभामुखसँग परामर्श

सभामुखलाई भेटेर फर्कदै अध्यक्ष प्रचण्डसहितका नेताहरु

काठमाडौं । प्रतिनिधिसभाको बैठकमा दुई नेकपाको ब्यवस्थापन कसरी गर्ने भन्नेबारेमा अन्योल काउम छ । सभामुख अग्निप्रसाद सापकोटाले संसदीय दलको नेता पुष्पकमल दाहाल‘प्रचण्ड’लाई मान्यता दिएमा ओली समूहले बबन्डर मच्चाउने संभावना छ ।

प्रतिनिधिसभामा संसदीय दलको नेता प्रचण्डलाई मान्यता दिएमा ओली समूहले सभामुख बिरुद्ध हुलहुज्जत गर्नसक्ने प्रवल सम्भावना छ । त्यही भएकाले सभामुखले नेकपाको प्रचण्ड–माधव समूहसँग आइतबार बिहान परामर्श गरेका छन् ।

आइतबार बिहान प्रचण्ड–माधव समूहका नेताहरु भेला भएर छलफल गरी सभामुख सापकोटासँग परामर्शका लागि गएका थिए । सभामुखसँग उनीहरुले करिब २० मिनेट छलफल गरेका थिए । प्रधानमन्त्री केपी ओलीले संसदीय दलमा अल्पमतमा परेपछि पनि राजीनामा दिएका छ्रैनन् । राजीनामा नदिएको अवस्थामा अविश्वास प्रस्ताव अघि बढाउने बताएको प्रचण्ड–माधव पक्ष त्यसबारे अझै अनिर्णित छ । यही अन्योलका बीचमा उनीहरुले सभामुखसँग परामर्श गरेका छन् ।

शुक्रबार बसेको प्रचण्ड–माधव समूहको संसदीय दलको बैठकले प्रतिनिधि सभा बैठक अघि नै प्रधानमन्त्री ओलीले राजीनामा दिनुपर्ने, नदिए अविस्वास प्रस्ताव अघि बढाउने निर्णय गरेको थियो ।