एमालेका प्रभावशाली नेता बासुदेव घिमिरे रास्वपा प्रवेश गर्दै, बिष्णु पौडेलको क्षेत्रबाट उम्मेदवारी दिने

काठमाडौं । नेकपा (एमाले)का नेता तथा पूर्वसांसद वासुदेव घिमिरे राष्ट्रिय स्वतन्त्र पार्टी (रास्वपा) प्रवेश गर्ने तयारीमा छन् ।

रुपन्देहीमा जनधार भएका उनलाई रास्वपाले प्रतिनिधिसभामा उम्मेदवार बनाउने भएको छ । उनलाई रास्वपाले रुपन्देही २ बाट उम्मेदवार बनाउने तयारी गरेको छ । जुन क्षेत्रबाट यसअघिको निर्वाचनमा एमालेका उपाध्यक्ष बिष्णु पौडेलले जितेका थिए ।

क्षेत्र संघीयतापछि तिलोत्तमा नगरपालिकाका नगर प्रमुख बनेका घिमिरे २०७९ सालमा रुपन्देही क्षेत्र नम्बर ५ बाट प्रतिनिधिसभा सदस्य निर्वाचित भएका थिए ।

घिमिरेले काठमाडौँ महानगरपालिकाका मेयर बालेन शाहसँग भेटघाट गरेपछि रास्वपा प्रवेशको चर्चा सुरु भएको हो । स्रोतका अनुसार उनलाई रुपन्देही क्षेत्र नम्बर २ बाट प्रतिनिधिसभा सदस्यको उम्मेदवार बनाउने प्रस्तावसमेत आएको छ र त्यसमा उनी सकारात्मक देखिएका छन । रास्वपाले औपचारिक कार्यक्रममार्फत घिमिरेलाई पार्टी प्रवेश गराउने तयारी गरिरहेको बताइएको छ ।

तिलोत्तमा नगर प्रमुख रहँदा उत्कृष्ट काम गरेको भन्दै मेयर बालेन साहले अघिल्लो प्रतिनिधिसभा निर्वाचनमा घिमिरेको पक्षमा सार्वजनिक रूपमा प्रशंसा गरेका थिए ।

यसअघि नै एमाले लुम्बिनी पूर्व प्रदेश कमिटी सदस्य मञ्जु भुसाल र युवासंघका पूर्व केन्द्रीय सदस्य श्रद्धा कुँवरलाई रास्वपाले समानुपातिक सूचीमा राखिसकेको छ । केही दिनअघि एमाले रुपन्देहीका सचिव तथा सैनामैना नगरपालिकाका मेयर चित्रबहादुर कार्की पनि रास्वपा प्रवेश गरिसकेका छन् ।

एमालेले समानुपातिक सूचीमा रुपन्देही जिल्लाबाट एक जनाको पनि नाम नपठाएपछि जिल्लाका कार्यकर्तामा पार्टी नेतृत्वप्रति असन्तुष्टि बढ्दै गएको बताइएको छ । यही असन्तुष्टिको पृष्ठभूमिमा घिमिरेसहितका नेताहरूको रास्वपातर्फ आकर्षण बढ्दै गएको देखिन्छ ।