मोहनविक्रम सिंह भन्छन्–एमसीसी पारित गर्न ओली र कांग्रेसको सरकार बन्दैछ

बुटवल । सर्वोच्च अदालतले प्रतिनिधिसभा बिघटनलाई सदर गर्ला र चुनावबाट बहुमत आउला भन्ने आशामा रहेका नेपाली कांग्रेसका सभापति शेरबहादुर देउवा पुनस्र्थापना भएपछि असमन्जसमा परेका छन् । अब उनी केपी ओलीसँग मिलेर प्रधानमन्त्री हुने र एमसीसी पारित गराउने खेलमा छन् । 
 यो कुराको रहस्य नेकपा मसालका महामन्त्री मोहनविक्रम सिंहले खोलेका छन् । उनले आज बुटवलमा एक कार्यक्रममा नेकपा ओली समूह र कांग्रेसको सरकार बन्ने दाबी गरेका छन् ।

बुटवलमा पत्रकारसँग कुरा गर्दै पुराना  नेता सिंहले एमसीसीबारे एजेण्डा मिल्ने भएकाले नयाँ सरकार ओली समूह र कांग्रेसले बनाउने दाबी गरेका हुन् । उनले भनेका छन्– ‘एमसीसी पारित गराउन ओली समूह र कांग्रेसको सरकार बन्ने सम्भावना छ ।’

नेता सिंहले प्रधानमन्त्री ओलीमा नैतिकता भए तत्काल राजीनामा दिनुपर्नेमा समेत जोड दिएका छन् । प्रतिनिधिसभा पुनस्र्थापनाले संविधान थप बलियो र विश्वसनीय भए पनि राजनीतिक अस्थिरता भने बढ्ने उनले अनुमान गरेका छन् ।

नेता सिंहले ओली र देउवाको चाहना अनुसार एमसीसी पारित भए नेपाल अमेरिकी सैन्य अखडा बन्ने भएकाले यो दुर्घटनाबाट देशलाई रोक्न  समिकरण बन्न दिनु नहुने उल्लेख गरे ।

सर्वोच्चको फैसलापछि पनि मुलुक अस्थिर बन्ने आशंका भने उनले गरेका छन्। सिंहले भने, ‘ओलीको अध्यारो यात्रामा अंकुश लागे पनि अब नयाँनयाँ जटिलताहरू थपिँदै जानेछन्’।