सुनिल थापाले राष्ट्रपतिको सल्लाहकारबाट राजीनामा दिए. राष्ट्रियसभा सांसदमा लाने देउवाको तयारी

काठमाडौं । राष्ट्रपति रामचन्द्र पौडेलका राजनीतिक सल्लाहकार सुनिलबहादुर थापाले राजीनामा दिएका छन् । उनले राजीनामा दिनुको कारण नखुलाएका छैनन् । तर आगामी माघ ११ गते हुने राष्ट्रियसभाको सदस्यको निर्वाचनमा कोशी प्रदेशबाट नेपाली कांग्रेसको उम्मेदवार बन्नका लागि उनले राजीनामा दिएको स्रोत बताउँछ ।

नेपाली कांग्रेसका सभापति शेरबहादुर देउवाले उनलाई राष्ट्रियसभामा उम्मेदवार बनाउने बचन दिएपछि उनले राजीनामा दिएको बताइन्छ । राष्ट्रियसभा निर्वाचनमा कांग्रेस–एमालेबीच गठबन्धन गर्ने सहमति लगभग भइसकेको छ । ६० प्रतिशत कांग्रेस र ४० प्रतिशत एमालेले लिनेगरी कांग्रेस–एमालेले सहमति गरिसकेका छन् ।

२०७९ मंसिर ४ गते भएको प्रतिनिधिसभा निर्वाचनमा धनकुटाबाट पराजित भएका थापा त्यसपछि एकाध महिना मात्र बेरोजगार बसी राष्ट्रपतिको सल्लाहकार भएका थिए ।
प्रतिनिधिसभा निर्वाचनमा पराजित भएलगत्तै उनी तलव र राज्यमन्त्रीसरहको सेवा सुबिधा पाउनेगरी राष्ट्रपतिको सल्लाहकार नियुक्त भए ।

जनताको विश्वास जित्न असफल भएका थापालाई कांग्रेस सभापति शेरबहादुर देउवाले राष्ट्रपतिको सल्लाहकारमा पठाए । कांग्रेसमा कुनै योगदान नभएका र नवप्रवेशी थापालाई राष्ट्रपतिको सल्लाहकारमा नियुक्ति गरेकोमा पार्टीभित्र चर्को बिरोध भएको थियो ।

जनताबाट अस्वीकृत ब्यक्तिलाई संसदबाट निर्वाचित राष्ट्रपतिले नियुक्ति दिएर जनमतको अपमान गरेको आरोपसमेत लागेको थियो ।

राष्ट्रपतिको सल्लाहकार भएपछि पार्टी गतिबिधिमा निस्क्रिय हुनुपर्ने भए पनि थापा भने झन सक्रिय भएर लाग्दैआएका छन । पदीय मर्यादा बिर्सेर धनकुटामा सामान्य धारा बत्ती, सडकको उद्घाटन उनले बेलाबखत गर्नाले विवादमा पर्दैआएका छन् ।

धनकुटेलीहरुसँग घुलमिल हुन नसकेका उनको ल्याकतले आगामी प्रतिनिधिसभाको निर्वाचन जित्न नसकिने देखेपछि थापा अर्कै बाटोबाट सांसद हुने दाउमा लागेका छन् ।

जेनजी आन्दोलनपछि सुदन गुरुङसँगको शंकास्पद भेटले सुनिलबहादुर थापा विवादमा तानिएका थिए ।

उनी नागरिक सरकारमा मन्त्री हुनका लागि गुरुङसँग भेट्न पुगेको अर्थ पनि कतिपयले लगाएका थिए । तर धनकुटाकै प्रधानमन्त्री भएकाले आफू राष्ट्रपति रामचन्द्र पौडेलको कोटाबाट उनलाई समेत विश्वासमा लिई मनोनीत हुने कोसिस गरिरहेका छन् ।