प्रतिनिधि सभा निर्वाचनका लागि १० हजार ९२६ मतदान स्थल, ३ हजार ५१८ स्थान अति संवेदनशील

काठमाडौँ । आगामी २१ फागुनमा हुने प्रतिनिधि सभा निर्वाचनका लागि १० हजार ९२६ मतदान स्थलहरू रहने भएका छन् ।

निर्वाचन आयोग, गृह मन्त्रालय तथा सुरक्षा निकायहरूलेसमेत रिपोर्ट र मतदाताहरूको सङ्ख्यालाई आधार मानेर १० हजार ९२६ मतदान स्थलहरू राख्ने गरी तयारी भएको छ ।

अघिल्लो निर्वाचनको मतदान स्थलहरू र अहिलेको मतदाता संख्या समेतलाई मध्यनजर गरेर १० हजार ९२६ मतदान स्थलहरू राख्ने गरी तयारी गरिएको छ ।

यो अहिलेसम्म प्रारम्भिक तयारी रहेको र यसमा केही थपघट हुनसक्ने गृह मन्त्रालयले जनाएको छ ।

उक्त मतदान स्थलमध्ये ३ हजार ५१८ मतदान स्थलहरू अति समबेदनशील सूचीमा रहने बताइएको छ । सुरक्षा चुनौतीको आधारमा मतदान स्थलहरूलाई सामान्य, संवेदनशील र अति सामान्य गरी तीन भागमा वर्गीकरण गरिएको छ ।

जसमध्ये सुरक्षा निकायको रिपोर्टको आधारमा अहिले ३ हजार ५१८ मतदान स्थललाई अति संवेदनशीलको सूचीमा राखिएको हो । अति संवेदनशील मतदान स्थलमा सोही अनुसार सुरक्षाकर्मी थप परिचालन गर्ने गरी तयारी गरिएको छ ।

त्यसैगरी ४ हजार ५२९ मतदान स्थललाई संवेदनशीलको सूचीमा राखिएको छ । तराईका जिल्लाहरू बढी अति संवेदनशील र संदेनशीलको सूचीमा परेका छन् ।

२ हजार ८७९ मतदान स्थलहरूलाई भने सामान्यको सूचीमा राखिएको छ । यसरी वर्गीकरण गरिएका मतदान स्थलहरूमा सुरक्षार्कीको संख्या कति र कसरी परिचालन हुने भन्नेबारे छलफल भइरहेको छ । यसको अन्तिम टुंगो भने लाग्न बाँकी छ ।

२२ हजार ३०४ मतदान केन्द्र रहने गरी तयारी गरिएको छ । यसको संख्यामा निर्णय हुन बाँकी रहेकाले केही तलमाथि हुने बताइएको छ ।

उक्त मतदान केन्द्रहरूमध्ये ७ हजार १५० मतदान केन्द्रहरू अतिसंवेदनशीलको सूचीमा राखिएको छ । संवेदनशीलको सूचीमा ९ हजार ३२० मतदान केन्द्रहरू छन् । ५ हजार ८३४ मतदान केन्द्रहरू भने सामान्य सूचीमा राखिएको छ ।